Partia Demokratike ashtu siç edhe është bërë e ditur edhe më parë më 20 prill do të mbledhë Këshillin Kombëtar. Mësohet se mbledhja do të zhvillohet në orën 18:00. Ndërkaq, bëhet e ditur se në rend të ditës do jenë Vendimi i Kryesisë Qendrore të PD për ndryshimet statutore.
Pak ditë më parë, kreu i PD-së, Lulzim Basha mblodhi kryesinë e PD-së për të vendosur mbi ndryshimet statusore, që do t’i propozohen më 20 prill Këshillit Kombëtar dhe do të miratohen nga Kuvendi Kombëtar me 28 dhe 29 prill.
Anëtarësia e kryesisë diskutoi rekomandimet e grupit politik të punës për ndryshimet statutore, të cilat pritet të jenë ndryshime rrënjësore.
PD synon afrimin e vendimmarrjes tek anëtarësia. Konkretisht propozohet për përfshirjen e anëtarësisë në procesin e përzgjedhjes së kandidatëve për deputetë. Kandidaturat, pa asnjë kufizim, që plotësojnë kriteret, kalojnë në filtrin e anëtarësisë përpara se institucionet qendrore, Kryesia dhe Këshilli Kombëtar të marrin vendimin përfundimtar.
Ndryshimet u japin kompetenca të qarta organeve qendrore (Kryesi, Këshill Kombëtar dhe Kuvend Kombëtar) për vendimmarrje të rëndësishme politike të partisë, duke përfshirë miratimin e propozimeve për kandidatura, për koalicione dhe aleanca, për strategjitë dhe programet politike dhe elektorale; Vendosja e parimeve dhe garancive për zgjedhje transparente dhe demokratike në çdo nivel; Parimi i transparencës, garantimi i barazisë së kandidatëve në garë dhe garancia mbi kontrollin e procesit zgjedhor; Të detajohen plotësisht në rregulloren e brendshme të partisë që duhet të miratohet nga Këshilli Kombëtar; Forcimin e rolit të institucionit të kontrollit të partisë, Komisioni Apelimit/gjykatës, dhe ngritja e tij të bëhet që në mbledhjen e parë të Këshillit Kombëtar.
Për të bërë një instrument real që ka besueshmëri për anëtarësinë është propozuar që komisioni të jetë në nivel nacional. Standardet etike të bashkëjetesës dhe disiplinës së partisë; Futja e konceptit të “dëmit ndaj partisë”, si parim qe përdoret nga CDU gjermane dhe parashikon rastet kur anëtari kalon në grup tjetër parlamentar; merr pjesë në aktivitete të kundërshtarëve politik; mban publikisht qëndrim kundër politikës së partisë, publikon informata konfidenciale dhe sensitive; shkel ligjet dhe kryen akte të rënda në kundërshtim me etikën qytetare.
