Milan mund të buzëqeshë. Kuqezinjtë janë pranë rinovimit me Patrick Cutrone. Drejtori sportiv i klubit, Massimiliano Mirabelli ka kontaktuar me menaxherët e lojtarit, Giovanni Branchini dhe Donato Orgnoni për të nisur negociatat për nënshkrimin e kontratës së re.
Kjo do të jetë hera e tretë që 20-vjeçari rinovon kontratën me gjigantët italianë brenda një viti. Talenti “axurr” pritet të firmosë një marrëveshje që e mban lidhur me Milanin deri në vitin 2022, me një klauzolë që i jep të drejtën e shtyrjes së kontratës edhe për një vit tjetër.
Cutrone është vërtetë zbulimi i Milan këtë sezon, ai e ka nisur aventurën e tij te kuqezinjtë duke u pozicionuar pas shpinës së Andre Silvas dhe Kalinic, ka ditur të fitojë një vend si titullar duke shënuar 15 gola këtë sezon: 7 në kampionat, 2 në Kupën e Italisë dhe 6 në Europa League.
Këto paraqitje në fushë me fanellën e “Djallit” kanë tërhequr vëmendjen e klubeve të ndryshme, të cilat janë në kërkim të futbollistëve të tillë të talentuar.
Nisur nga kjo drejtuesit e Milan nuk kanë dashur që të ndikohen nga të papriturat, por nga ana tjetër edhe të shpërblejnë Cutronen për kontributin që ka dhënë për skuadrën.
Por, në listën e Mirabellit nuk është vetëm Cutrone, siç raporton Calciomercato.com, bëhet fjalë edhe për Mattia El Hilali (kapiteni i Primavera), mbrojtësi i majtë 19-vjeçar, Andres Llamas dhe 17-vjeçarin, Raol Bellanova (mbrojtës i djathtë).