Edhe pse niveli i borxhit publik në Shqipëri ka arritur në 69.9% në 2017, përsëri në mbetemi një ndër vendet me nivelin më të lartë krahasuar me rajonin.
Sipas Bankës Botërore është e nevojshme që qeveria të vijojë reformat midis të cilave të ulë shpenzimet për mirëmbajtjen dhe për personelin në mënyrë që të arrijë një borxh nën 60 % në vitin 2022.
Shqipëria mbetet një ndër vendet me nivelin më të lartë borxhit publik krahasuar me vendet e rajonit, duke qenë një problem serioz për ecurinë ekonomike.
Sipas të dhënave të Ministrisë së Financave, borxhi publik u ul në nivelin 69.9 për qind të prodhimit kombëtar, nga 72.3 për qind që ishte në dhjetor të vitit 2016.
E megjithatë Banka Botërore rekomandon që të vijojë konsolidimi fiskal, duke ulur në mënyrë të veçantë shpenzimet për personelin, mirëmbajtjen dhe qeverisjen lokale.
Sipas raportit të Bankës Botërore, raporti i borxhit publik në ekonominë shqiptare duhet të ulet nën 60% të Prodhimit të Brendshëm Bruto deri në vitin 2022.
Dy vite më parë, parlamenti shqiptar miratoi një ligj, i cili e detyron qeverinë të ulë borxhin vit pas viti.
Por sipas këtij institucioni mbetet shqetësim realizimi i projekteve PPP, pasi do të ndikojnë direkt tek treguesi i borxhit, duke qenë në vetëvete një borxh i fshehur.
Banka Botërore sugjeron më shumë kujdes, në mënyrë që çdo investim të jetë me kosto efektive për të ulur ndikimin.
Ndërsa sugjeron ndërmarrjen e një sërë reformash për të nxitur rritjen ekonomike, midis të cilave përmirësimin e klimës së të bërit biznes, realizimin e reformave ligjore, të pronës dhe përmirësimin e aftësive të forcës së punës.
