Kryetari i Grupit Parlamentar të Partisë Demokratike, Edmond Spaho, është shprehur se kryeministri Edi Rama duhet të përjashtohet nga Kuvendi i Shqipërisë me arsyen se ka fyer rëndë shqiptarët.
Në studion e Tv Klan, Spaho tha se nëse një deklaratë e tillë si ajo që Rama krahasoi popullin me organet gjenitale, do të bëhej në një vend europian, një kryeministër i tillë do të dënohej shumë rëndë.
Ai shtoi se Edi Rama nuk ka për të folur më në seancat plenare nëse nuk përjashtohet dhe nëse nuk lirohen qytetarët e Kukësit nga burgu.
Sipas tij, kryeministri Rama pranoi gabimin e qeverisë dhe për këtë ndjesë, ai duhet t’i lirojë ata.
“Edi Rama nuk ka për të folur më në këtë Kuvend, nëse nuk përjashtohet dhe nëse nuk liron qytetarët e Kukësit nga burgu, pasi pranoi se gabova. Pse duhet të rrinë në burg ata, kur kryeministri tha se gabova. Qytetarët atje janë për bukën e gojës, ne flasim lehtë këtu”, deklaroi Spaho
