Analisti Fatos Lubonja i ftuar sot në emisionin “Studio e Hapur” të gazetares Eni Vasili në News2 tha se situata e tensionuar mes opozitës dhe mazhorancës është një prelud i një situate shpërthyese.
“Nuk më shqetëson kjo hedhje uji e vezësh, ekziston një mungesë dialogu dhe fryma e konfliktualitetit që është e dëmshme. Problemi që ka rënduar situatën këtu është drejtësia jonë. Ata të Kukësit u arrestuan dhe u mbajtën aty, por mos të hetosh këta të mëdhenjtë dhe të merresh me këto të Kukësit këtu është problemi.
Se po të kishim ne drejtësi, këta që thotë Spiropali duhet të ishin të gjithë në burg. Ne kemi atë që e Drejtësinë e kap njëherë njëri e pastaj tjetri. Kur s’kemi drejtësi, do kemi dhunë, kur ka mungesë dialogu, ka dhunë. Këtë mazhorancë e shoh tepër arrogante. Ajo që më shqetëson është se gjithë këta deputetë socialistë i shohin haptazi koncesionet e grabitjet që bën ky, është çmenduri. Unë shoh një situatë të dëshpëruar ose do ketë konflikt ose autoritarizëm të partisë në pushtet,” tha Lubonja.
