Rey Manaj mund të vazhdojë aventurën në kampionatin spanjoll të futbollit me Granadan.
Sipas së përditshmes italiane “Gazzetta dello Sport”, klubi iberik që aderon në Segunda Division mund të blejë kartonin e sulmuesit kuqezi për 1 milionë euro.
Por, kjo varet nga paraqitjet e tij deri në fund të sezonit me ekipin që drejtohet nga Jose Luis Oltra. 21-vjeçari është huazuar për një sezon nga gjigantët italianë të Serie A, Inter te skuadra andaluziane.
Manaj ka zhvilluar 17 ndeshje deri më tani me “Nazaries”, ku vetëm në dy prej tyre e ka nisur titullar. Në total ai ka luajtur 464 minuta dhe ka shënuar një gol të vetëm në transfertën e fituar 1-3 ndaj Numancian.
Lojtari është huazuar nga Inter tek Pecara në 2016-ën dhe më pas te Pisa që drejtohej nga Gennaro Gattuso, ku nuk la shumë gjurmë.
Mirëpo, eksperienca e re në kampionatin spanjoll duket që i ka dhënë më shumë qetësi dhe lojtari është përshtatur në mënyrën e duhur pavarësisht se trajneri nuk i ka dhënë besimin mjaftueshëm sulmuesit kuqezi.
Trajneri i Kombëtare së Shpresave, Alban Bushi e riktheu për dy takimet që zhvilluan ndaj Sllovakisë në kuadër të Europianit të moshës u-21.
Në takimin e parë futbollisti lushnjar shënoi dy golat e parë që i dhanë avantazhin skuadrës por që më pas miqtë përmbysën me anë të Apalek, Dimun dhe Mraz.
Në ndeshjen e kthimit të luajtur në “Štadión pod Dubňom” përsëri Manaj shënoi golin e vetëm për skuadrën kuqezi në humbjen 4-1.
Në dy takime të vetme me fanellën e përfaqësueses U-21, 21-vjeçari tregoi vlerën në fushën e blertë duke bërë që edhe vetë trajneri Bushi të pranonte “gabimin” që nuk e ka ftuar në përballjet e mëparshme.
Madje, më tej ai shtoi se “Manaj e meriton të thirret nga trajneri Panucci, pasi është një lojtar i pjekur”. Megjithëse, tekniku italian deri më tani nuk e ka grumbulluar lushnjarin në asnjë takim që ka zhvilluar.
