Bayern Munich mund të jetë në procesin e blerjes për një portier dhe emri i yllit të Barcelonës ka dalë!
Marc-Andre Ter Stegen ka qenë i lidhur me gjermanët të cilët, sipas “Don Balon”, janë të gatshëm të ofrojnë deri në 100 milionë euro për të siguruar shërbimet e 25-vjeçarit.
Lajmi vjen, pasi gjithnjë e më shumë raporte po tregojnë, se Manuel Neuer mund të jetë jashtë për një kohë të gjatë dhe madje mund të detyrohet t’i japë fund karrierës së tij, diçka që ai vetë e pranoi në javën e kaluar.
“Don Balon” shkruan, se bavarezët janë të gatshëm të shpenzojnë deri në 100 milionë euro për të nënshkruar me Ter Stegen, i cili ka treguar një nivel shumë të lartë në sezonin e tij të dytë në Spanjë, duke e bërë punën e tij në mënyrë të shkëlqyer.
Në fakt, ish-portieri i Borussia Mönchengladbach është aktualisht portieri më i mirë i kombëtares gjermane, duke e bërë atë zgjedhjen e parë për drejtuesit e Bayern Munich.
Megjithatë nuk do të jetë aq e lehtë për t’i mbushur mendjen drejtuesve të Barcelonës, sa kur e morën mesfushorin Thiago Alcantara nga katalanasit.
Në atë periudhë ylli i Spanjës donte të largohej nga “Camp Nou” dhe të bashkohej me Pep Guardiola, ndërsa ai nuk ishte aq i rëndësishëm sa Ter Stegen tani.
25-vjeçari konsiderohet si një nga portierët më të mirë në botë dhe duket shumë e vështirë, që Barcelona ta shesë në merkaton e ardhshme.
Gjithsesi nëse drejtuesit e Bayern vendosin të paguajnë 100 milionë euro sa raporton “Don Balon”, ndoshta katalanasit mund të vendosin të heqin dorë nga shërbimet e tij.