Nga Boldnews.al
Grupi investigues amerikan “Judicial Watch” ka siguruar dokumentat, të cilat provojnë se rreth 9 milionë dollar të taksapaguesve amerikanë janë përdorur në Shqipëri për të financuar Fondacionin “Soros”.
Sipas investigimit të bërë publik nga vetë grupi dhe i ri-publikuar në disa media online në Shqipëri, rezulton e provuar se fondet që i janë alokuar USAID-it për forcimin e demokracisë në Shqipëri, janë kanalizuar në llogaritë e Soros-it.
Fondacioni i ka përdorur këto fonde gjigande për të ndihmuar kryeministrin Edi Rama për të realizuar Reformën në Drejtësi që i siguron atij pushtet mbi gjyqësorin. Gjithashtu, investigimi zbuloi se një pjesë e këtyre fondeve, të menaxhuara nga shtetas shqiptarë shumë të afërt me Edi Ramën, kanë shkuar për lobimin në favor të qeverisë, duke goditur imazhin e forcave opozitare.
Investigimi lë të kuptohet se personi përgjegjës për keqpërdorimin e fondit 9 milionë dollarë, Ambasadorin e SHBA në Tiranë, Donald Lu. Dokumentat e siguruar nga “Judical Watch”, të siguruara në bazë të Ligjit për Informimin në Amerikë, tregojnë për komunikimet e shpeshta të administratës së ambasadës në Tiranë me përfaqësues dhe zyrtarë të Fondacionit Shoqëria e Hapur për Shqipërinë-Soros.
“Boldnews.al”, si edhe media të tjera online, e kanë publikuar të plotë raportimin e grupit investigues amerikan. Ky publikim pritet të dëmtojë rëndë figurën e ambasadorit Lu, i cili, edhe aktualisht, ka humbur besueshmërinë në opinionin publik shqiptar, për shkak të anësisë së treguar në favor të qeverisë socialiste të Edi Ramës.
Donald Lu, një diplomat karriere, u konsiderua si figura kyçe ndërkombëtare për realizimin e Reformën në Drejtësi në Shqipëri. Ai u investua përtej petkut diplomatik, me qëllimin që politika shqiptare të realizonte reformën më të rëndësishme në periudhën e post-komunizmit.
Për këtë angazhim, ai fitoi besimin dhe mbështetjen e opinionit publik, të lodhur nga ece-jaket në dyert e sistemit të drejtësisë për mbi 20 vjet. Por, nga një figurë shumë popullore, imazhi i ambasadorit Lu filloi të cënohej për shkak të afërsisë që krijoi me qeverinë e Edi Ramës. Disa zëra publikë në Tiranë, gjithësesi të veçuar, nisën të flisnin për lidhjet Rama-Lu-Soros. Këto zëra, në një terren mbytës mediatik nën kontrollin e qeverisë, nuk morën shumë hapësirë.
Por, dokumentat e publikuar nga “Judical Watch” konfirmojnë në mënyrë zyrtare këtë lidhje. Madje, shkohet edhe më tej. Investigimi flet për keqpërdorimin e fondit 9 milionë dollarë të USAID-it nga administrata e ambasadës në Tiranë.
Donald Lu, njeriu që ka folur më shpesh dhe më fortë për “peshqit e mëdhenj” në Shqipëri, ndoshta duhet të japë një përgjigje publike nëse “vjedhja/keqpërdorimi i 9 milionë dollarëve të qytetarëve amerikanë a konsiderohet vjedhje në SHBA?”
Nëse quhet vjedhje, që natyrisht është e tillë, atëherë ndoshta “peshqit e mëdhenj” në Shqipëri duhet të kërkohen edhe tek zyrtarë vendimmarrës të ambasadës më të rëndësishme në vendin tonë.
