Pas tensioneve në Gjykatën e Tiranës, kjo e fundit ka ndërprerë seancën ku do të caktohej edhe masa e sigurisë për 23 të arrestuarit pas protestës së dhunshme në Kukës për tarifën e Rrugës së Kombit. Shkak i shtyrjes është bërë kërkesa e avokatëve, të cilët kërkojnë që të largohet policia nga salla. Po ashtu jashtë u nxorën edhe gazetarët, ndërsa deputetët e opozitës (PD+LSI) nuk u lejuan të futen.
Sitauta
Forca të shumta policie janë rreshtuar para Gjykatës për të parandaluar ndonjë tension të mundshëm. Masa e sigurisë për 23 të ndaluarit që akuzohen nga Prokuroria e Kukësit si përgjegjës për dhunën në protestën e organizuar të shtunën në ‘Rrugën e Kombit’ kundër taksës për mjetet qe kalojnë në këtë aks rrugor pritet të jepet sot në Gjykatën e Tiranës rreth orës 09.00.
Gjithashtu është ndaluar qarkullimi rrugor në atë aks, duke vështirësuar edhe rrugën për shkollë të nxënësve të “Pjetër Budit”.
Në krahun tjetër të Lanës, ndodhen disa qytetarë që protestojnë. “Lironi djemtë tanë,” dëgjohet të thonë ata.
Mësohet se për shkak të transferimit të çështjes në kryeqytet është mungesa e kapaciteteve në Gjykatën e Kukësit.
Dosja e personave të arrestuar ka mbërritur pranë Gjykatës që dy ditë më parë. Ndërkohë, 13 persona janë shpallur në kërkim.
Dhjetra qytetarë protestuan ditën e shtunë në shenjë kundërshtie për taksën prej 10 euro (vajtje-ardhje) që do të aplikohet në Rrugën e Kombit. Por gjatë protestës situata degjeneroi në konfrontime fizike me policinë.
Qytetarët hodhën gurë dhe nisën të shkatërronin pajisjet e koncensionarit, ndërsa policia iu përgjigj me gaz lotsjellës. Ndërkohë shumë prej protestuesve pretendojnë se janë dhunuar nga policia.
