Policia ka ndezur alarmin e kuq për tifozët e Liverpool para takimit që ekipi i tyre do të luajë sot ndaj Manchester City-t.
Në një njoftim për shtyp, uniformat blu kanë lajmëruar ultrasit vendas se autobusët e të dyja skuadrave nuk do të kalojnë më në të njëjtën rrugë që të çon për në “Anfield”, për të evituar incidentet e mundshme.
Vitet e fundit, mijëra tifozë të Liverpool janë rreshtuar në atë rrugë për të përshëndetur trajnerin e ekipit për ndeshje të mëdha.
Ata ishin përgatitur që para këtij takimi të prisnin me flakadanë në duar ekipin duke krijuar kështu një atmosferë armiqësore edhe për skuadrën kundërshtare.
Si përgjigje ndaj incidenteve të mëparshme, Policia ka konfirmuar se të dy autobusët e ekipit nuk do të kalojnë në rrugën e zakonshme për shkak të punimeve që po bëhen aty dhe për sigurinë e tifozëve.
Menjëherë klubi i “The Reds” i është përgjigjur kësaj deklarate ku ka ftuar tifozët të presin ekipin në një tjetër rrugë, para se të futen në stadium.
Në bashkëpunim me policinë Liverpool ka siguruar një rrugë tjetër që tifozët të presin dhe takojnë lojtarët.
“Ne kërkojmë që çdo mbështetës që dëshiron të mbështesë ekipin, ta bëjë këtë në mënyrë miqësore, të respektueshme dhe të kujdesshme”- thuhej më tej në deklaratën e klubit të kuq.
Tifozët e Liverpool kishin planifikuar një pritje armiqësore për kundërshtarët në mbrëmjen e sotme, për këtë policia pas shqetësimeve të ngritura nga City, vendosi që të gjejë një zgjidhje që të evitonin përplasjen mes tyre.
E njëjta situatë është përsëritur gjatë sezonit 2013/2014 kur ultrasit e Liverpool mbushën rrugën drejt Anfield para ndeshjes me Chelsea, ku nuk pati munguar atmosfera e zjarrtë por dhe incidentet.
Liverpool dhe Manchester City do të luajnë sonte në 20:45 në kuadër të fazës çerekfinale të Champions League në “Anfield”.
