Nga Boldnews.al
Fati gjyqësor ndaj 23 kuksianëve, i cili u zhvillua nën masa ekstreme sigurie në Tiranë, rezulton që të jetë tërësisht i paragjykuar. Përtej debatit publik dhe politik që shoqëroi protestën në Rrugën e Kombit, në aspektin ligjor procesi penal ndaj të arrestuarve është shoqëruar me një sërë shkeljesh proceduriale nga ana e Policisë dhe Prokurorisë, të cilat morën vulën edhe të gjykatës.
Rikthehemi në një retrospektivë të shpejtë; pas përfundimi të protestës së të shtunës, Ministri i Brendshëm, Fatmir Xhafaj, doli në një konferencë për media në orën 14.30 të asaj dite dhe foli për akte dhune nga protestuesit.
Pak orë më vonë, Kryeprokurorja e Përkohshme, Arta Marku, në një njoftim të paprecedent për institucionin, deklaron se “…Prokuroria e Rrethit Gjyqësor Kukës, Drejtuesja e saj Alketa Nushi me një grup prokurorësh të kësaj prokurorie, shkuan në vendgjarje dhe po punojnë për të gjetur autorët dhe shkaktarët e dhunës…”.
Pak orë pas nxitjes nga ana e Kryeprokurores së Përkohshme, prokurorja e Kukësit, Alketa Nushi nxjerr një numër të lartë urdhër-ndalimesh. Duke iu referuar njoftimit publik të Kryeprokurores, është lehtësisht e kuptueshme se përgjegjësia për nxjerrjen e këtyre urdhërave i atribuohet Arta Markut.
Një pjesë e urdhërave të ndalimit të prokurorisë u ekzekutuan nga policia në mes të natës. Urdhërat e ndalimit u shoqëruan edhe me kontrollin e banesës së personave të dyshuar. Të arrestuarit e deklaruan këtë gjë para gjykatëses Alma Ahmeti, e cila qartësisht nuk e mori në konsideratë këtë fakt, i cili përbën shkelje flagrante të Kodit të Procedurës Penale.
Neni 206 i Kodit të Procedurës Penale parashikon qartësisht se “Kontrolli në një banesë nuk mund të fillojë para orës shtatë dhe pas orës njëzet. Në raste të ngutshme organi procedues mund të urdhërojë me shkrim që kontrolli të bëhet tej këtyre caqeve”
Përjashtim nga ky rregull përbën vetëm në rastet e flagrancës. Por, në rastin konkret, 23 kuksianët nuk janë arrestuar në flagrancë nga Policia, por janë ndaluar me urdhër të prokurorit shumë orë pas protestës.
Ky veprim arbitrar i Policisë, e cila ka ndërhyrë në mes të natës në banesat e të dyshuarve përbën shkak për pavlefshmërinë e akteve të hetimit paraprak. Në këtë rast, pavlefshmëria qëndron në faktin e ndalimit dhe kontrollit të banesës përtej orarit të lejuar nga ligji. Këtë shkelje duhet ta konstatojë “prokurori dhe, nëse nuk kryhet nga ky i fundit, çmohet nga gjyqtari i seancës paraprake”, parashikon neni 130 i Kodit të Procedurës Penale.
Duket qartë që prokurori jo vetëm që nuk ka preferuar ta konstatojë shkeljen, por ka pranuar që Policia e Shtetit të ndryshojë qëllimisht orën e ndalimit të personave, shoqëruar me kontrollin e banesave. Pra, Alketa Nushi e Kukësit, nën kontrollin e Kryeprokurores Arta Marku, ka pranuar shkeljet e rënda ligjore të policisë në ekzekutimin e urdhërave të ndalimit.
Përtej prokurorit, një rol të rëndësishëm në evidentimin e shkeljeve proceduriale e ka gjykata. Në rastin konkret, gjyqtarja Alma Ahmeti është njohur me pretendimet e të dyshuarve dhe avokatëve të tyre për shkeljen ligjore lidhur me orën e ndalimit. Por, asgjë nuk ndodhi.
Gjyqtarja nuk kreu asnjë verifikim lidhur me deklarimet e të ndaluarve. Gjykata e ka detyrim ligjor për të kryer të gjithë verifikimet e nevojshme para caktimit të masës së sigurimit. Por, duket qartë se ajo e kishte caktuar që më parë fatin e kuksianëve të varfër që protestuan kundër arrogancës qeveritare. Gjyqtarja, e cila rezulton të jetë edhe bashkëshortja e një zyrtari të lartë në Policinë e Shtetit, noterizoi të gjithë kërkesat e prokurorit; 11 arrest me burg, 2 arrest në shtëpi dhe detyrim për paraqitje për pjesën tjetër të protestuesve.