Deputetët pritet të miratojnë ditën e enjte në seancë plenare Kodin e ri të Etikës, edhe pse mendohet që kjo seancë do të jetë e nxehtë, për shkak edhe të zhvillimeve që kanë ardhur si pasojë e protestës për taksën e Rrugës së Kombit. Paraprakisht, opozita dhe mazhoranca kanë arritur të bien dakord për dokumentin që i është dërguar seancës për miratim.
Në projektim prej 12 faqesh përcaktohen rregulla të qarta dhe të forta që nga veshja e deputetëve, sjellja me njëri-tjetrin, konflikti i interesit, moskonsumimi i lëndëve alkoolike e narkotike, apo edhe ngacmimet seksuale në mjediset e punës. “Deputetit i ndalohet të paraqitet në gjendje të mungesës ose të uljes së ndjeshme të ekuilibrit fizik dhe/mendor për shkak të konsumimit të alkoolit ose të substancave narkotike”, – thuhet në një prej pikave të kodit të ri që është përfunduar pak ditë më parë, pikërisht më 28 mars.
“Çdo deputet përpiqet të sigurojë dhe të mbajë një mjedis pune pa ngacmime seksuale. Ai reagon menjëherë, raporton, kërkon evidentimin dhe hetimin e rastit, kur merr dijeni të ndonjë pretendimi për ngacmim seksual, duke mundësuar që viktima e ngacmimit seksual të mos frikësohet, të mos denigrohet dhe të mos injorohet pretendimi i tij”, – thuhet në projektvendimin e Kuvendit.
Një nen tjetër tejet i rëndësishëm është ai që specifikon vlerën e dhuratave që duhet të pranojë një deputet, jo më shumë se 10 mijë lekë. “Deputeti nuk mund të kërkojë ose të marrë në mënyrë të drejtpërdrejtë a të tërthortë dhurata me vlerë mbi 10 mijë lekë, favore, premtime ose trajtime preferenciale, të cilat i jepen për shkak të pozicionit të tij nga një individ, person fizik ose juridik privat”, – thuhet në një tjetër pikë të kodit. “Deputeti, të cilit i janë ofruar dhurata, favore, premtime ose trajtime preferenciale, sipas pikës 1 të këtij neni, duhet: a) t’i refuzojë ato dhe, në rast se ofrimi është kryer pa dijeninë e tij ose paraprakisht, t’ia kthejë mbrapsht ofruesit ose në pamundësi, t’i dorëzojë zyrtarisht pranë shërbimit përgjegjës në Kuvend për administrimin e objekteve me vlerë, të cilat më pas përdoren për qëllime të veprimtarisë së institucionit”.
Në rast se ofrimi ose dhënia e të mirave të sipërpërmendura lidhen me kryerjen e një vepre penale, deputeti bën kallëzim pranë organit të ndjekjes penale, ndërsa dhuratat që kanë vlera artistike, muzeale ose historike administrohen në institucion dhe ekspozohen.
Po ashtu, deputetëve u ndalohet të përdorin celularin në punimet parlamentare. Në fund të projektvendimit përcaktohet se “një vit nga përfundimi i mandatit, deputeti nuk mund të hyjë në marrëdhënie kontraktuale konsulence ose kontratë pune biznesi ose individuale me Kuvendin ose të veprojë si avokat i paguar, palë kundërshtare, në çështje ku Kuvendi është palë”.
