Padyshim që shorti i çerekfinales së Champions League nuk i rezervoi një ndeshje të lehtë Romës, përkundrazi, ekipi verdhekuq “peshkoi” një nga rivalët më të fortë të mundshëm, Barcelonën.
Megjithatë në shtëpinë e klubit italian, dëshirojnë ta shohin gotën gjysmëplot, duke shpresuar për një rezultat pozitiv përballë klubit kalatanas.
Është Drejtori Sportiv, Monchi ai që përpara kësaj super përballjeje përpiqet të injektojë doza optimizmi në grupin e lojtarëve verdhekuq.
“Nuk ka skuadra të pamposhtshme dhe këtë e dinë të gjithë, edhe Barcelona, edhe pse në këtë sezon kanë humbur vetëm 3 ndeshje nga 48 që kanë luajtur. Por unë kur luaj të tilla ndeshje në ëndrrat e mia, shikoj hapësirë, mundësi për të shënuar gol. I shikoj këto gjëra të udhëhequra nga shpresa, por sigurisht, kur zgjohem, e di shumë mirë që nuk do të jetë aspak e lehtë.”
Me këto fjalë drejtuesi i italianëve kërkon të karikojë lojtarët për përballjen me Barcelonën. Takimi i parë i fazës çerekfinale do të zhvillohet në “Camp Nou” për t’u luajtur 1 javë më pas në “Olimpico” të Romës.
“Ata te blaugranat janë një klub i madh – nënvizon Monchi në një intervistë të dhënë për mediat italiane – Sikur të ishte vetëm Lionel Messi! Sikur i gjithë shqetësimi ynë te kundërshtari të ishte vetëm Messi. Argjentinasi është me siguri më i miri, ashtu siç u paraqit edhe në ndeshjen kundër Sevillas, është në gjendje të zgjidhë një takim për vetëm 60 sekonda, por për mua është thjesht një pjesë e rëndësishme e sukseseve të Barcelonës. Klubi katalanas aplikon një futboll të jashtëzakonshëm më lojtarë që me ose pa Messin, formojnë një grup shumë të rëndësishëm.”
