Analisti Fatos Lubonja thotë se kryeministri Edi Rama përdor një gjuhë të dhunshme dhe fyese ndaj qytetarëve shqiptarë. Në emisionin “Studio e hapur” me Eni Vasilin në “News24”, ai thotë se shqiptarët e kanë humbur shpresën, dhe thonë se “ky vend nuk bëhet”. Shkak për këtë situatë sipas Lubonjës është bërë kapja e shtetit nga një grup oligarkësh, që duan të pasurohen në kurriz të qytetarëve.
“Ne nuk shquhemi për të mbrojtur të drejtat e njeriut në standardet botërore. Ju e patë se çfarë ndodhi para dy ditësh në Francë, ku policia kontrolloi një polic në një ambient ku nuk duhet ta bënte këtë, dhe u bënë reagime të jashtëzakonshme nga shoqëria civile dhe shteti. Ndërsa ne i marrim njerëzit tufë, naten, që është në shkelje të të drejtave të njeriut, dhe i terrorizojmë. Kjo është kultura jonë e vjetër. Ky është vetëm një aspekt i kulturës s dhunës. Ka shumë kohë që ky kryeministër përdor një gjuhë të dhunshme, fyese dhe poshtëruese ndaj njerëzve.
Edhe një gjuhë mospërfillje dhe arrogance, se unë kam marrë votën dhe bëj ç’të dua. Kam kartonin. Kjo është dhuna e parë. Pastaj ka edhe dhunë ekonomike. Thënë më ndryshe ne këtu kemi një dhunë strukturore, që i ka bërë njerëzit më të tulatur. Pra ne kemi një mungesë shprese, është ky trajtim i njeriu që të thotë se ky vend nuk bëhet. Kjo për faktin se një grusht njerëzish ka kapur shtetin, dhe e përdor për t’u pasuruar në kurriz të të tjerëve”, u shpreh Lubonja.
