Monika Kryemadhi, Kryetare e LSI-së, u shpreh sot shqiptarët janë ngritur kundër regjimit që Edi Rama po instalon, kundër krimit dhe varfërimit.
“Jemi me qytetarët e Kukësit dhe mbështesim protestat që protestojnë kundër zhvatjes që po i bën Kryeministri. Edi Rama dhe oborri i tij arrogant i mbyllur në kullat e oligarkëve nuk po e kupton se shqiptarët janë ngritur kundër regjimit skllavërues që po instalon”, tha Kryemadhi në një deklaratë për mediat, pas mbledhjes së Grupit Parlamentar të LSI.
Kryemadhi tha se fjala e tij para shqiptarëve ishte një fyerje që iu bë jo vetëm shqiptarëve, por edhe shprehje e qartë e antikombëtarizmit të tij, që i trajton shqiptarët të Kosovës, si klientë të oligarkëve të tij.
“Ne jo vetëm distancohemi, por e dënojmë me forcë fjalorin e tij si prej rrugaçi dhe përçmimin që bëri ndaj vëllezërve kosovarë. Në zbatim të Rregullores së Kuvendit do të kërkojmë përjashtimin e Edi ramës. Qëndrimi ynë ndaj Parlamentit do të jetë një vendimmarrje politike në funksion të mënyrës së sjelljes së këtij Kryeministri ndaj kërkesave të qytetarëve të Kukësit.
I bëjmë thirrje prokurorisë të respektojë ligjin. Ftoj prokurorinë të zbatojë me korrektësi ligjin, të mos marrë në mbrojtje provokatorët e dhunës të dërguar në Kukës nga Edi Rama. Çdo përdorim politik i saj do të ketë kosto. Prokuroria të hetojë edhe konçensionarin dhe të gjithë proçedurën. Opozita e bashkuar po ndjek hap pas hapi situatën.
Protesta është një e drejtë e qytetarëve, për të kërkuar të drejtat e mohuara. As ai që pretendon se i ka të gjitha pushtet”, u shpreh Kryemadhi. Sipas saj, qelitë e komisariateve përpara se të ishin mbushur me qytetarët e pafajshëm, duhej të ishin mbushur me trafikantët e drogës.
