Kryeministri Edi Rama nuk është mjaftuar me konferencën e gjatë, shpjeguese, emocianale dhe herë herë kërcënuese, të mbrëmjes së djeshme, por për të njëjtën çështje ka mbledhur sot gazetarët gjatë paradites, për protestën në tunelin e Kalimashit.
Ka kursyer fjalët “kazan” për median, por i ka kritikuar disi se përse nuk ua shpjegojnë qytetarëve si është e vërteta e taksës së Rrugës së Kombit. Gjithashtu ishte më i trimëruar, kur foli për arrestimin e “banditëve” që dogjën zyrat e kompanisë private dhe dhunuan policinë e shtetit, por hallin e kishte tek mijëra qytetarë që dolën masivisht në këtë protestë.
Mund të konsiderohet i sbrapsur nga ideja e vjeljes së taksës për banorët e Kukësit, duke bërë kalkulime pa sens, se do të matet kush e përdor më shumë këtë aks dhe më pas do të jepet një abone për këta përdorues të kësaj rrugë, duke paguar më pak nga çfarë është parashikuar.
Si për të treguar se nuk është “krahinor” po vë në zbatim projektin e së “ardhmes” se edhe rruga e re që do të ndërtohet në aksin Kashar-Rrogozhinë do të jetë me taksë, njësoj si Durrës-Kukës. Por në çdo fjalim Rama ishte i dëshiruar për shumë pyetje dhe nuk ndoqi taktikën e përhershme me gazetarët, duke bërë një deklaratë sipas dëshirës së tij dhe më pas të niste avazin me injorimin apo përbuzjen e medias.
Ramën e tradhëtoi vetja kur u pyet për mijëra protestues, duke tentuar ta minimizonte protestën e djeshme, pasi më shumë se dhuna e ushtruar dhe shkatërrimi i traut që rjep qytetarët me taksë, e tremb revolta popullore.
