E ardhmja e Iscos te Real Madrid është e dyshimtë. Mesfushori bëri paraqitje të shkëlqyer e kombëtaren e tij, Spanjën në ndeshjet miqësore ndaj Gjermanisë (1-1) dhe Argjentinës, ndaj të cilës shënoi tre gola (6-1).
25-vjeçari pas ndeshjes në një prononcim për median pranoi se me ekipin përfaqësues ndihet i lumtur pasi trajneri i ka dhënë besim për këtë edhe forma e tij aty është gjithnjë pozitive ndërsa tek Reali nuk është njësoj.
Mirëpo, në konferencën e djeshme për shtyp, Zinedine Zidane tha se “nuk është i padrejtë” me Iscon, pasi ka shumë lojtarë në ekip që duan të aktivizohen.
Tekniku francez e komplimentoi lojtarin për ndeshjen e luajtur ndaj Argjentinës ndërsa tha se do të vazhdojë të qëndrojë në “Santiago Bernabeu”.
E përditshmja spanjolle në artikullin e sotëm të publikuar për “magjikun” shkruan se vetë iberku e ka në dorë të ardhmen e tij, nëse do të vazhdojë me “Los Blancos” apo do të nisë një aventurë të re në një kampionat tjetër.
Për mesfushorin janë afruar disa ekipe, ndër to është përfolur se ish-trajneri i Barcelonës, Pep Guardiola ka shprehur dëshirën që ta ketë malaguenin në skuadër te Manchester City. Prej disa ditësh mediat angleze dhe iberike shkruajnë që tekniku i “Qytetarëve” ka shprehur interes për të marrë shërbimet e futbollistit shtatshkurtër në “Etihad Stadium”.
Isco e ka shprehur qartë që dëshiron të fitojë një vend në formacionin titullar të Zidane, por ky i fundit duket që nuk është bindur akoma nga loja e spanjollit. Megjithatë, në media ende vazhdon pyetja për trajnerin e madrilenëve: “Nëse Isco është magjik përse nuk është zgjedhje e parë e Real Madrid?”
Një pyetjeje të tillë Zidane i është përgjigjur ditën e djeshme, ndërsa theksoi se lojtari do të ketë vendin e tij në ekip dhe se nuk do të largohet këtë merkato.
Isco ka regjistruar 150 ndeshje me fanellën e kampionëve në fuqi të Champions League dhe ka shënuar 30 gola.
Real Madrid do të luajë sot ndaj Las Palmas në orën 18:30 në “Estadio de Gran Canaria” në kuadër të javës së 30-të të La Ligës. Isco dhe Ramos do të jenë dy mungesat e vetme për këtë takim, për shkak të një lëndimi të vogël që kanë pësuar nga ndeshjet me përfaqësueset e tyre.
