Zinedine Zidane duket se është i qartë për të ardhmen e tij dhe se ku e shikon veten.
Edhe pse është përfolur për një largim të mundshëm të trajnerit francez nga Real Madrid, kjo për shkak të nisjes jo të mirë që “Los Blancos” i bënë këtij sezoni, ish-lojtari është i vendosur për atë që dëshiron të bëjë.
Gjithashtu emri i tij është përfolur edhe si pasuesi i Unai Emery te Paris Saint-Germain, me trajnerin aktual të francezëve që me të gjitha mundësitë do të shkarkohet në fund të këtij sezoni. 45-vjeçari pak ditë më parë deklaroi se nuk e shikon veten e tij në një klub si Parisi, kjo pasi në mendjen e tij nuk ekziston tjetër skuadër përveçse madrilenëve.
Diçka të tillë, Zidane e konfirmoi edhe në konferencën për shtyp që ekipi i tij do të zhvillojë kundër Las Palmas, me “Galaktikët” që për këtë takim priten të mos kenë në dispozicion Cristiano Ronaldon. Ai e bëri të qartë që objektivi i tij është të vazhdojë të drejtojë Realin edhe për sezonet e ardhshme.
“Po, do të më pëlqente shumë që të vazhdoja të drejtoja Realin e Madridit edhe në të ardhmen, sepse si gjithmonë, më pëlqen futbolli, më pëlqen shumë ajo që po bëj dhe e di shumë mirë se ku jam… por gjithsesi futbolli dihet se si është. Nëse do të varej nga mua, do të qëndroja te Real Madrid, dhe ideja ime është që të vazhdoj sa më gjatë të jetë e mundur. Diçka të tillë e kam thënë disa herë. Por, fakti qëndron se në Madrid, gjithçka varet nga rezultatet që ti arrin. Erdha këtu kur isha 18-vjeç dhe e di shumë mirë se si funksionon te Reali i Madridit. Bëj atë që më pëlqen dhe kam shumë dëshirë të vazhdoj të bëj këtë gjë”.
