Nga Boldnews.al
E mërkura ishte ditë seancash në Gjykatën e Lartë, por këtë javë janë shtyrë të gjithë proceset penale dhe civile. Shkak për këtë situatë të paprecedentë është mungesa e gjyqtarëve, e cila sjell pasojë mos-krijimin e trupave gjykuese.
Gjykata e Lartë duhet të ketë 19 anëtarë, por aktualisht në detyrë janë vetëm 9. Në këto kushte, gjykata më e lartë e vendit është në një kolaps të plotë. Pas bllokimit të Gjykatës Kushtetuese, e cila nuk mund të marrë vendime, për shkak se ka vetëm 5 nga 9 anëtarë, tashmë është radha e Gjykatës së Lartë që të stopojë punën e saj.
Kjo situatë, e cila është e pakrahasueshme me asnjë periudhë tjetër të shtetit shqiptar, është përgjegjësi e drejtëpërdrejtë e maxhorancës qeverisëse, e cila ka bllokuar dhe ngadalësuar proceset e nevojshme për emërimin e gjyqtarëve të rinj, si në Gjykatën Kushtetuese, ashtu edhe në Gjykatën e Lartë.
Anëtarët e Gjykatës së Lartë emërohen nga Presidenti i Republikës, me propozim të Këshillit të Lartë Gjyqësor.
Ky Këshill ende nuk është formuar, pasi kandidatët janë ende në procesin e Vetingut. Komisioni i Rivlerësimit Kalimtar (Vetingut), cili tashmë duket qartë që është nën kontrollin qeveritar, ka nisur procesin verifikues për kandidatët, por ende nuk ka asnjë rezultat deri më tani.
Këshilli i Lartë Gjyqësor, në rastin më të mirë, mund të krijohet pas 6 muajsh. Kjo, pasi, në përfundim të procesit të Vetingut, kandidatët gjyqtarë për këtë këshill, do të votohet fillimisht nga Mbledhje e Përgjithshme e Gjyqtarëve. Më tej, lista e përzgjedhur do t’i përcillet Presidentit të Republikës, i cili nga ana e tij do të firmosë emërimet.
Reforma në drejtësi, e cila ka parashikuar pastrimin e radhëve të gjyqësorit, aktualisht e ka vendosur në situatë kolapsi sistemin gjyqësor. Hartuesit e Reformës në Drejtësi, të mbështetur nga projekte të mirëfinancuara ndërkombëtare, në rastin më të mirë nuk e kanë menduar këtë situatë.
Ose, në rastin më të keq dhe që duket më i mundshmi, maxhoranca socialiste, e cila komandon “levat” e institucioneve të reja të Reformës në Drejtësi, e ka krijuar qëllimisht këtë situatë. Një sistem gjyqësor i bllokuar i shërben më së miri qeverisë “Rama”, e cila nuk është aspak immune nga fenomeni i korrupsionit galopant.
