Politika e taksave të qeverisë së Edi Ramës po rezulton e dështuar si në planin e brendshëm, ashtu edhe në thitjen e investimeve të huaja.
Banka Botërore raporton se gjatë vitit 2017 është shënuar një ulje e konsiderueshme e fluksit të investimeve të huaja direkte në ekonominë shqiptare.
Në vitin 2017, fluksi i investimeve të huaja u ul në 908 milionë euro, krahasuar me 942 milionë euro gjatë vitit 2016.
Në “paradat” e tij butaforike me investitorë të huaj, Rama mundohet të bëhet interesant me batuta. Kujtojmë këtu shprehjet që u tha investitorëve italianë rreth një vit më parë që “mund të afroheshin në Shqipëri, pasi këtu nuk ka sindikata”.
Mënyra trendy e kryeministrit shqiptar nuk ka arritur të sigurojë rritje të investimeve të huaja. Përkundrazi, gjatë vitit 2017 u shënua edhe një rekord negativ përsa i përket këtyre investimeve. Nga Shqipëria u largua një prej brandeve më të njohur botëror dhe ndër të paktët në vendin tonë, “Sheraton”.
Korrupsioni i përhapur në administratën publike, politika e gabuar e taksimit, ndryshimet e shpeshta në legjislacion tatimor, si edhe siguria e ulët ka ndikuar që investitorët e huaj të qëndrojnë larg Shqipërisë.
Kryeministri Rama, pavarësisht se është në dijeni të plotë të dështimit në sektorin e investimeve të huaja, vijon të reklamojë arritje të mëdha ekonomike.
Por Banka Botërore, institucioni më i besueshëm në ekonominë botërore, raporton të dhëna aspak premtuese për ekonominë shqiptare.
Sipas BB, në bazë të krahasimit tremujor, fluksi neto i investimeve të huaja direkte ra gjithashtu – në 232.2 milionë euro në tremujorin e katërt të vitit 2017, nga 299.6 milionë euro në periudhën korrik-shtator, njoftoi banka qendrore në një raport të hënën.
Vëllimi më i madh i investimeve të huaja në Shqipëri në tremujorin e katërt, prej 58.4 milionë euro, filloi në Zvicër, e ndjekur nga Franca me 38.6 milionë euro.
Sektorët, të cilët tërhoqën vëllimin më të madh të investimeve nga jorezidentët në periudhën tetor-dhjetor 2017, ishin minierat dhe guroret me 73.9 milionë euro dhe furnizimin me energji, gaz dhe ujë me 55 milionë euro.
Aktualisht, ekonomia e Shqipërisë ushqehet nga dy projekte të mëdha energjetike – ndërtimi i tubacionit Trans-Adriatik (TAP) dhe puna në një hidrocentral përgjatë lumit Devoll.
