Nga Boldnews.al
Anëtari i shkarkuar i Gjykatës Kushtetuese është “viktima” e parë e procesit të Vetingut. Javën e kaluar, treshja e komisionerëve, e drejtuar nga Kryetarja e Komisionit, Genta Bungo vendosi që të largojë Lulon nga detyra, për shkak se nuk justifikonte pasurinë me burime të ligjshme.
Por ky proces vendimmarrës është shoqëruar me disa prapaskena, të cilat “Boldnews.al” i ka mësuar në mënyrë ekskluzive.
Nga verifikimet paraprake, të kryera nga Komisioni i Vetingut, gjyqtari Lulo rezultonte se kishte dokumentacionin e nevojshëm për të justifikuar pasurinë e tij, përfshirë edhe shumën cash me 100 mijë dollarësh dhe një zyrë në Tiranë, të dhuruar nga e motra e tij.
Komisioni i Vetingut caktoi seancën dëgjimore me Fatos Lulon, duke i “sugjeruar” privatisht që mund të mos paraqitej personalisht, por me një përfaqësues ligjor. Sipas “sugjeruesve”, rezultatet e verifikimit ishin pozitive dhe nuk ishte e nevojshme që ai të ishte vetë pjesëmarrës në seancë.
Gjatë seancës së parë dëgjimore, të zhvilluar nga Komisioni i Vetingut, Lulo, nëpërmjet përfaqësuesit të tij, paraqiti edhe disa dokumenta shtesë, me të cilat mbështeste pretendimet mbi burimin e pasurisë.
Këto dokumenta u pranuan nga ana e Komsionit të Vetingut dhe seanca për marrjen e vendimit u shty për dy ditë. Këtu është moment kur nisi ndryshimi i situatës në disfavor të Lulos.
Përfaqësues të lartë të një ambasade të rëndësishme në Tiranë kanë zhvilluar kontakte intensive me Komsionin e Vetingut në harkun kohor ndërmjet dy seancave të zhvilluara për Fatos Lulo.
Në përfundim të këtyre “negociatave”, përfaqësuesit e huaj kanë arritur të “bindin” anëtarët e Komisionit të Vetingut se Fatos Lulo nuk e justifikon pasurinë e tij me burime të ligjshme.
