Është rikthyer edhe një herë për diskutim në parlament kërkesa e Partisë Demokratike, në lidhje me Referendumin e Ligjit të Mbetjeve. Kërkesa, e cila është depozituar që në vitin 2016 nga e djathta konsiston pikërisht në ndalimin e importimit të mbetjeve në vendin tonë.
Nënkryetari i komisionit të Ligjeve, Oerd Bylykbashi ngriti alarmin se mazhoranca po kërkon që të riktheje mbetjet në Shqipëri, duke rrezikuar kështu seriozisht jetën e qytetarëve.
“Jemi përpara riskut shumë të lartë që mazhoranca të rikthejë importin e mbetjeve. PD mendon se importi i mbetjeve rrezikon jetën dhe shëndetin e qytetarëve. T’i drejtohemi popullit që të na japë qëndrimin e tij”, ai duke risjellë edhe një herë në vëmendje rrezikun që sipas tij do tu vijë shqiptarëve nga mbetjet që do të sjellin tre kompanitë e inceneratorëve.
Ndërsa në emër të mazhorancës, deputeti Bled Çuçi theksoi se ‘kërkesa formalisht është e rregullt”. “Duhet të ekzistojë çështja për referendum me qartësi”, tha ndër të tjera ai. “ku komision nuk ka kompetencë për të vendosur për këtë çështje”, tha ai duke sqaruar se do të jetë Komisioni për Veprimtaritë Prodhuese ai që do të jetë vendimmarrës.
