Usain Bolt ka veshur fanellën e një skuadre futbolli, më saktësisht atë të Borussia Dortmund duke plotësuar kështu ëndrrën e tij.
Që kur u tërhoq nga atletika, rekordmeni olimpik e kishte bërë të qartë se ëndrra e tij ishte të niste karrierën si futbollist.
Pak ditë më parë xhamajkani deklaroi se së shpejti do të angazhohej me një klub futbolli dhe tashmë është zbuluar çdo gjë.
31-vjeçari iu bashkua verdhezinjve në stërvitje për të nisur provën e tij, nëse mund të bëjë si lojtar apo jo. Të shumtë ishin dhe të pranishmit në qendrën stërvitore, dhe jo më kot, kur bëhet fjalë për njeriun më të shpejtë të planetit është normale që kureshtja të jetë e madhe.
Ashtu si dhe pjesa tjetër e skuadrës, Bolt kreu stërvitjen normalisht, teksa u njoh edhe më mirë me ambientin dhe shokët e tij te rinj.
I pyetur nga gazetarët e pranishëm, Bolt u shpreh se gjithçka shkoi shumë mirë dhe se u kënaq shumë me djemtë, duke theksuar se e pritën shumë mirë.
Nga ana tjetër, xhamajkani tha se ky është një test i rëndësishëm për të, për të kuptuar se sa larg mund të shkojë në këtë profesion të ri.
Edhe Mario Gotze u pyet për shokun e tij të ri të skuadrës:
“Mendoj se shkoi mirë. Bolt u ndje rehat dhe ne ishim të aftë ta integronim mirë në ekip. Ishte mirë në aksione”- u shpreh 25-vjeçari.
