Kryeministri Edi Rama, në një intervistë për “Financial Times” ka kërkuar edhe një herë tjetër nga BE hapjen e negociatave me Shqipërinë si pjesë e zgjerimit të Unionit drejt Ballkanit Perëndimor për të forcuar sigurinë evropiane.
Rama tha se do të ishte “çmenduri” për BE-në të dështonte të përqafonte rajonin që tashmë ndodhet në epiqendër të rrugëve të migrimit dhe të pikasur nga Rusia si një çmim strategjik.
“Për ne do të ishte shumë e çuditshme nëse Shqipëria nuk do të hapte menjëherë negociatat, pasi ka bërë ekzaktësisht gjithçka i është kërkuar të bëjë”, tha Rama, duke nënvizuar se Serbia dhe Mali i Zi tashmë i kanë nisur negociatat për anëtarësim në BE. Intervista e dhënë gjatë vizitës në Bruksel vjen para samitit të liderëve të BE-së që do të mbahet këtë javë.
Rama foli për rëndësinë e Shqipërisë dhe vendeve fqinje në uljen e rrjedhës së imigrantëve për në Union, teksa shtoi se interesat dhe influenca e Rusisë në Ballkanin Perëndimor – megjithëse nganjëherë e ekzagjeruar – është reale.
“Moska kurrë nuk ka hequr dorë nga të shikuarit e rëndësisë gjeopolitike të rajonit – e cila nuk shikohet nga shumë në BE, me përjashtim të kancelares gjermane Angela Merkel”, tha Rama.
“Është çmenduri të mendosh se Ballkani Perëndimor mund të lihet mënjanë, vetëm, jashtë Europës”.
Kreu i ekzekutivit tha se Shqipëria kishte bërë “përparim mahnitës” në uljen e kultivimit të kanabisit dhe shkallën e vrasjeve në vend.
