Komisioni i Vetingut, përtej pritshmërive të larta të publikut, rrezikon të shndërrohet në një levë politike në dorë të qeverisë së Edi Ramës.
Pa nisur mirë punën e tij, vetëm me pak vendime të para, duket qartë që trupa verifikuese për gjyqtarët dhe prokurorët po punon me shënjestra të paracaktuara para se ky Komision të krijohej.
Në fokusin e tyre janë gjyqtarë e prokurorë, të cilët kanë shprehur qëndrime publike kundër ndërhyrjes së qeverisë në sistemin e drejtësisë.
Gjithashtu, janë ajo pjesë e trupës gjyqësore, të cilët kanë marrë edhe “mallkimin” e ambasadorit amerikan në Tiranë, Donald Lu, mbështetës i paketës së Reformës në Drejtësi, pavarësisht problemeve të theksuara që kanë këto ligje.
Emri i parë që u etiketua nga Komisioni i Vetingut si person me probleme është gjyqtari i Gjykatës Kushtetuese, Fatos Lulo. Për Lulon, të martën u zhvillua séance dëgjiomore, e para e këtij lloji gjatë procesit të Vetingut.
“Boldnews.al” ka raportuar më parë se Lulo është një prej anëtarëve të Kushtetueses që ka votuar kundër qeverisë gjatë shqyrtimit gjyqësor të ligjit “Për organet e qeverisjes së sistemit të drejtësisë” dhe “Kodit të Procedurës Penale.
Emri i dytë, i etiketuar nga Komisioni i Vetingut si person me problem është ish-gjyqtari i Gjykatës Kushtetuese, Besnik Imeraj. Për Imerajn, Komisioni i Vetingut ka referuar materialet e hetimit administrativ në Prokurori.
Besnik Imeraj rezulton një prej gjyqtarëve Kushtetues që ka votuar kundër ligjit të Vetingut, me argumentin se gjatë këtij procesi kishte ndërhyrje të ekzekutivit.
Pas këtyre dy “objektivëve” të paracaktuara, duket se lista vijuese është lehtësisht e verifikueshme.
Emri në radhë që pritet të ketë problem nga Komisioni i Vetingut është një tjetër anëtar i Gjykatës Kushtetuese, Gani Dizdari. Edhe ky i fundit rezulton se ka votuar kundër ligjit për Vetingun, së bashku me kolegun e tij, Besnik Imeraj.
Pra, në një lloj “hakmarrje” institucionale nga ana e Komisionit të Vetingut, Dizdari, me shumë mundësi, do të jetë shënjestra e radhës.
Duke kaluar te institucioni i Prokurorisë, nuk do të jetë aspak surprizë nëse Komisioni i Vetingut do të referojë material kallëzues për ish-Prokurorin e Përgjithshëm, Adriatik Llalla.
Komisioni i Vetingut ndërpreu procesin verifikues ndaj Llallës, për shkak se ky i fundit hoqi dorë nga e drejta e tij për t’u emëruar si gjyqtar në Apel.
Llalla u përfshi në një debat të ashpër me ambasadorin amerikan në Tiranë, Donald Lu. Kjo përplasje duket se po e shoqëron edhe pas largimit nga detyra. Diplomati Lu ka një ndikim të fuqishëm në Operacionin Ndërkombëtar të Monitorimit, misionin ndërkombëtar që asiston Komisionin e Vetingut.
Me këtë akses të plotë, Lu ka të gjitha mundësitë që të ndikojë në përkeqësimin e pozitës së ish-Prokurorit të Përgjithshëm.
Lista “e zezë” e Komisionit të Vetingut pritet të vijojë edhe me anëtarin e Gjykatës së Lartë, njëkohësisht kryetarin e Këshillit të Emërimeve në Drejtësi, Artan Broci.
Gjyqtari Broci është një prej juristëve që nuk e ka fshehur asnjëherë publikisht kundërshtinë e tij për përfshirjen e ekzekutivit në sistemin e drejtësisë, nëpërmjet Reformës në Drejtësi.
Të gjithë emrat e mësipërm bashkohen edhe në një pikë; atyre u është revokuar viza amerikane nga ana e ambasadorit Lu në fillim të vitit 2017, pikërisht për faktin se mbanin qëndrime alternative për Reformën në Drejtësi.
