Autroiteti i Mbikëqyrjes Financiare ka bërë gati një draft për zhvillimin e tregjeve, që të mos kemi vetëm banka dhe kompani sigurimi.Ky draft pritet të prezantohet në fillim të prillit.
Lajmi është bërë i ditur nga kreu i këtij institucioni, Ervin Koçi në një leksion të hapur me studentët e Fakultetit Ekonomik në Universitetin “Aleksandër Xhuvani” në Elbasan, në kuadër të strategjisë së AMF-së për rritjen e besimit të konsumatorëve dhe investitorëve në tregjet financiare.
Drejtori i Përgjithshëm Ekzekutiv i AMF-së theksoi se në fillim në muajit të ardhshëm, Autoriteti do të prezantojë strategjinë 5-vjeçare për zhvillimin e tregjeve.
Bëhet fjalë për një dokument të plotë orientues, i përpiluar me ndihmën e ekspertëve më të mirë, që do të shërbejë si një udhërrëfyes për punën e institucionit në drejtim të edukimit financiar, rritjes dhe zhvillimit të tregjeve, si edhe garantimit të mbrojtjes së konsumatorëve e investitorëve.
Sipas kreut të Autoritetit të Mbikëqyrjes Financiare, të gjitha vendimet e marra vitin e kaluar kanë qënë në funksion të mbrojtjes së konsumatorit dhe investitorit, ndërsa Autoriteti mbetet i angazhuar në zgjidhjen e disa problematikave të mbartura ndër vite në treg, siç është rasti i Fondit të Kompensimit.
“Edukimi financiar në lidhje me tregjet nën mbikëqyrjen e AMF-së, për të rritur njohuritë dhe ndërgjegjësimin te publiku është shndërruar në një nga prioritetet e punës së Autoritetit. Për këtë arsye, AMF nisi vitin e kaluar një fushatë informuese, duke zhvilluar takime në disa universitete të vendit, për të vazhduar edhe këtë vit, duke zgjeruar më tej edhe grupet e interesit”, deklaroi Koçi.
AMF nënshkroi me Universitetin “Aleksandër Xhuvani” në Elbasan edhe një marrëveshje bashkëpunimi, me përfitim reciprok. Ajo do t’i shërbejë studentëve të universitetit, duke i asistuar me materiale të ndryshme burimore, apo duke i krijuar mundësinë e intershipeve pranë Autoritetit.
Në anën tjetër, do të jetë një bazë e mirë për thellimin e bashkëpunimit me qëllim zgjerimin e njohurive financiare të studentëve dhe përgatitjen e tyre për tregun e punës.
