Shqipëria ka probleme serioze me nivelin e ulët të jetesës dhe varfërinë. Ky është konkluzioni i Fondit Monetar Ndërkombëtar, që i rekomandon
qeverisë shqipare ndërhyrje urgjente me reforma strukturore për të përmirësuar gjendjen. E thënë ndryshe, masa për rritjen e punësimit, përmirësimin e klimës së investimeve dhe nxitjen e rritjes ekonomike. FMN vlerëson se Shqipëria është ndër vendet e fundit në rajon, përsa i përket të ardhurave për frymë dhe rritja ekonomike nuk reflektohet në xhepat e qytetarëve.
Në deklaratën përmbyllëse të misionit të FMN-së, që u largua dje nga Shqipëria pas vizitës dy javore, theksohet se të gjitha këto nisma që qeveria duhet të ndërmarrë, vështirësohen nga niveli i lartë i emigracionit që ka përfshirë shoqërinë shqiptare.
Rekomandimet e FMN-së
Fondi Monetar Ndërkombëtar ka bërë një skaner të gjendjes së ekonomisë reale, ku evidenton se varfëria dhe niveli i ulët i jetesës mbetet problem për Shqipërinë. FMN vlerëson se nevojitet një rritje më e shpejtë për ta rritur standardin e jetesës dhe për ta ulur varfërinë, çka kërkon reforma institucionale themelore. “Për të thithur më shumë investime dhe për të arritur konvergjencë më të shpejtë, Shqipëria duhet t’u japë zgjidhje shumë pengesave strukturore. Paqartësitë mbi të drejtat e pronës dhe një gjyqësor i korruptuar dhe jo efikas evidentohen shpesh si pengesa kryesore për thithjen e investimeve. Aftësinë konkurruese e dëmtojnë më tej mungesat e infrastrukturës lidhëse, informaliteti i lartë, vështirësia për të marrë financim dhe kapitali i dobët njerëzor. Trajtimi i këtyre sfidave merr edhe më shumë rëndësi përballë ngadalësimit të rritjes së investimeve dhe produktivitetit në Shqipëri dhe në mbarë Evropën pas krizës financiare botërore. Këto sfida ndaj rritjes ekonomike përkeqësohen nga niveli i lartë i emigrimit nga Shqipëria”, theksohet në deklaratën përmbyllëse të misionit të FMN-së. Sipas ekspertëve të Fondit Monetar, tani është momenti për të zbatuar reformat për përmirësimin e klimës së investimeve, për të nxitur rritjen ekonomike dhe për të rritur mundësitë për punësim.
FMN parashikon që rritja ekonomike e Shqipërisë të ngadalësohet këtë vit në 3.7% nga 3.9% që ishte në vititn 2017. Efekti negativ do të vijë nga përfundimi i dy projekteve madhore të investimeve të huaja: gazsjellësi TAP dhe hidrocentrali i Devollit.
