Tatimi mbi pronën që pritet të aplikohet duke filluar që nga data 1 e muajit të ardhshëm, po shkakton debate në lidhje me kategoritë e përjashtuara nga ky detyrim fiskal.
Kliton Gërxhani, kreu i ATOA ( Shoqata e Tur Operatorëve Shqiptarë) mbështet nismën për përjashtimin e Hoteleve Brand nga taksa e pronës.
“Unë jam pro përjashtimit të hoteleve brand nga taksa e pronës. Unë vetë kam një hotel të vogël me 15 dhoma. Jam i kënaqur me incentivën e qeverisë për uljen e TVSh-së. Nëse kategoria jonë me kohën arrin të zhvillohet, le të përjashtohemi edhe nga tatimi mbi pronën.
Por hotelet brand janë një vlerë e shtuar në ekonominë tonë. Ne nuk kemi patur të tillë. Incentivat e qeverisë do të bëjnë që këto brande me vete do të sjellin paratë, marketimin dhe klientelën. Në këtë mënyrë, paratë e shtuara në arkën e shtetit, mund të shkojnë për kategoritë në nevojë”- shprehet për Ekonomix.al eksperti në fushën e turizmit, Kliton Gërxhani.
Sipas tij, përjashtimi nga ky tatim do të ketë efekte pozitive në ekonominë tonë.
Nuk është i të njëjtit mendimi eksperti në fushën e ekonomisë, Bujar Bendo.
Sipas tij, ky favorizim nuk do të pasqyrojë asnjë efekt në ekonomi.
“Parimisht nuk jam dakord. Nuk është mënyra për të nxitur investimet strategjike në fushën e hotelerisë dhe turizmit. Kjo është lehtësi me emra, lehtësi klienteliste. Nuk kam besim që do të sjellë benefite në ekonominë shqiptare”- shprehet për Ekonomix.al eksperti Bujar Bendo.
Tatimi mbi pronën që do të aplikohet nga 1 prilli dhe që mendohet se do të vilet nga bashkia, do të përjashtojë disa kategori si pensionistët kryefamiljarë që jetojnë vetëm, banesat sociale të ndërtuara nga bashkitë, hotelet brand me 4-5 yje.
