Nga Boldnews.al
Ndërsa në Lezhë pritet masa e sigurisë për 22 të arrestuarit, drejtues lokal të bashkisë dhe këshillit të qarkut, të akuzuar për “tjetërsim të pasurisë dhe falsifikim dokumentash”, njëri nga të prangosurit, socialisti Gjok Ndoka, nuk e ka pritur mirë qelinë, duke përfunduar në spital. Sipas mjekëve, ai është shtruar mbrëmë, pasi ka shfaqur probleme me zemrën. Masa e sigurisë për të do të zhvillohet në ambientet e spitalit.
Kjo nuk është një “risi”, pasi në të njëjtën formë ish-Kryetari i Bashkisë Vlorë Shpëtim Gjika vetëm pak orë pasi u prangos për shpërdorim detyre pësoi “godtitje” në zemër. Nisur edhe nga gjendja shëndetësore ai i shpëtoi arrestit me burg. Ndoshta diçka e tillë mund të pritet edhe në rastin Ndoka, Kryetarin e Këshillit të Qarkut Lezhë, xhaxhai i ish-deputetit socialist Arben Ndoka. Bashkë me Gjokën socialist, para gjykatës do të dalin edhe 11 drejtyues të tjerë të lartë të Bashkisë së Lezhës të drejtuar prej demokratëve, mes tyre edhe kryebashkiaku Fran Frrokaj, por deri më tani “rrahjet e zemrës” për të djathtët kanë qenë në nivele optimale…
Kjo nuk mund të thuhet për kampin tjetër kundërshtar, duke u kthyer pak në të shkuarën të njëjtën problem shëndetësor shfaqën edhe Tom Doshi, kur pritej të dilte para Komisionit Parlamentar për heqjen e imunitetit dhe Kristian Demokrati Mark Frroku. Që të dy dolën me luhatje tensioni. Këto situata me zyrtarët e majtë, më shumë se probleme të papritura shëndetësore u komentuan si një mënyrë për të shmangur “arrestin me burg” gjatë fazës hetimore. Taktika e vjetër, e hapur nga ish-kryebashkiaku Gjika, mund të përdoret edhe nga të rinjtë socialistë, që në të rrallë i kap lapsi për tu përballuar me drejtësinë.
