Prej 48 orësh që kryebashkiaku i Lezhës Fran Frrokaj qëndron në paraburgim, ndërsa qindra mbështetës të tij kanë protestuar, duke e konsideruar arrestimin për akuzën e “tjetërsimit të pronave”, si politik. Ajo që bie në sy është mungesa e deputetëve të PD-së të qarkut Lezhë në këtë protestë të mbështetësve të Frrokajt. Duket se drejtuesit e PD-së e “shitën” kryebashkiakun e tyre, për ta lënë vetëm në shprehjen: “drejtësia le të thotë fjalëne e saj”.
Një ditë pas arrestimit të Frrokajt dhe disa drejtuesve të tjerë të bashkisë, në Lezhë mbërriti kryedemokrati Lulzim Basha me deputetë të kësaj zone. Në takimin e mbajtur me strukturat drejtuese të partisë Basha u njoh me qëndrimet e tyre, por menjëherë pas takimit u largua, pa pasur një qëndrim të qartë. Pritej që nga ana e saj PD-ja ta konsideronte politik këtë arrestim, por kjo nuk ndodhi dhe tashmë kryebashkiaku mbetet i distancuar nga forca që përfaqëson. Për të konfirmuar një “distancim” nga krerët e lartë të partisë më të madhe opozitare është edhe një shkrim në gazetën zyrtare “Rilindja Demokratike” me titullin: “Darka e gabuar” e Frrokajt me Ramën dhe protesta”.
Ndër të tjera shkrimi i referohet takimit që kryebashkiaku Frrokaj pati me Ramën në fillim të muajit mars. “Frrokaj dhe Rama darkuan sëbashku. Pasi Frrokajn e thumbuan miqtë për këtë darkë, ai u përgjigj se ishte Kryeministër dhe duhet ta respektonte. Një nga miqtë e tij shkoi edhe më larg duke e paralajmëruar se pas kësaj darke “ka për ta hëngër” se Rama është i pabesë, gjë të cilën Frrokaj nuk e besoi”-shkruan gazeta RD.
Mungesa e të paktën deputetëve të zonës është komentuar nga protestuesit si rast i pa precedent, ndërsa vetë ata vijojnë të qëndrojnë jashtë ambienteve të Drejtorisë së Policisë Lezhë, aty ku mbahet i arrestuar kryebashkiaku.
