Tashmë është kthyer në një yll. Rusi Maksim Pastukhov, një prift ortodoks, ka një pasion të veçantë nga të gjithë ata që predikojnë, të ushtruarit bodybuilding. Trupi është gjithë muskuj dhe të gjithë habiten kur mësojnë se ai është prift, teksa femrat po çmenden pas formave të fizikut të tij. Pastukhov ka 6 vjet që drejton një kishë në rajonin e Belgorod në Rusi.
Por njëkohësisht, ai ka marrë pjesë në garat e zhvilluara për bodybuilding, duke regjistruar rezultate fantastike. Pastukhov ka marrë famë jo vetëm në vendin e tij, por tashmë i ka kaluar kufijtë. Prifti Maksim, në kampionatin e fundit rajonal të bodybuilding, zuri vendin e tretë, por natyrisht që tifozët më të shumtë i kishte ai, ku për shumë të rinj ai është kthyer në një idhull.
Prifti ka hapur një palestër për të rinjtë në vendin e tij, ku djemtë mund të stërviten rregullisht dhe falas, nën mbikëqyrjen e tij, teksa edhe predikon ndonjëherë. Për të blerë palestrën dhe për të organizuar seancat e fitnesit, prifti Maksim Pastukhov ka shitur shtëpinë e tij. Të rinjtë tani janë shkruar aq shumë në palestër, saqë duhet të bëjnë me turne. Por gjithashtu, edhe në kishë vijnë më shumë njerëz kur predikon ai.
