Zëdhënësi i Zyrës së guvernatorit të provincës Nangarhar, Attaullah Khogyani tha se cak i sulmit ishte tubimi publik proqeveritar në qendër të Xhelalabadit
Të paktën 5 civilë humbën jetën dhe 7 të tjerë u plagosën në shpërthimin i cili ndodhi në lindje të Afganistanit, raporton Anadolu Agency (AA).
Zëdhënësi i Zyres së guvernatorit të provincës Nangarhar, Attaullah Khogyani për AA tha se cak i sulmit ishte tubimi publik proqeveritar në qendër të Xhelalabadit.
“Mund të konfirmojmë se në vendin e shpërthimit janë vrarë të paktën 5 persona dhe 7 bashkëvendas tanë u plagosën. Sulmi me bombë ndodhi nga aktivizimi i mjetit shpërthyes në një motoçikletë para stadiumit të qytetit Gul Agha Shezai”, tha Khogyani.
Hetimet për rastin janë në vijim, ndërsa përgjegjësinë deri më tani nuk e ka marrë askush.
Në Xhelalabad sulmet me bomba janë të zakonshme të cilat i kryejnë grupet radikale të lidhura me organizatën terroriste DEASH.
