Sipas Partisë Demokratike, gjyqtarja Fildes Hafizi, përpara se të ekzekutohej nga ish-bashkëshorti i saj, kishte takuar drejtorin e Policisë së Shtetit, Haki Çakon dhe drejtorin e Krimeve, Ardian Çipën për t’i kërkuar ndihmë.
“Qeveria duhet të japë llogari: Pse Edi Rama ka ofruar çdo vit amnisti masive, gjë që nuk ka ndodhur asnjëherë më parë? Pse amnistitë e tij kanë përfshirë ulje dënimi dhe lirim të kriminelëve që kanë kryer vrasje apo tentuar të kryejnë vrasje? Pse policia nuk i afroi mbrojtje gjyqtares Hafizi kur ajo e kërkoi më shumë se një herë? Pse nuk vepruan për parandalimin e tragjedisë Drejtori i Përgjithshëm i Policisë së Shtetit dhe Drejtori i Krimeve në Policinë e Shtetit, të cilët u takuan personalisht nga gjyqtarja ku ajo kërkoi ndihmën e tyre?”
Ndër pyetjet që ngre PD në deklaratën e shpërndarë për mediat, është se pse këta drejtues të policisë nuk e ndihmuan dot gjyqtaren e ndjerë. Sipas PD-së vrasja e gjyqtares Fildes Hafizi nuk do të kishte ndodhur nëse krimineli nuk do të favorizohej nga veprimet e papërgjegjshme të shtetit.
Më pas Partia Demokratike vijon me propozimin për fillimin e lëgjislaturës së re me një ligj që ndalon uljen e dënimeve për vrasje dhe amnistimin e tyre.
“Partia Demokratike do të propozojë në fillim të legjislaturës së re një ligj i cili ndalon në çdo rrethanë uljen e dënimeve për vrasje dhe amnistimin e tyre. Ne do të propozojmë edhe ashpërsimin e dënimit për ata që ushtrojnë dhunë në familje, si dhe rritjen e mbrojtjes për viktimat e kësaj dhune. Ndërkohë, Partia Demokratike i kërkon qeverisë të rishikojë me urgjencë procesin e ofrimit të mbrojtjes nga shteti, për të shmangur mundësinë e injorimit të qytetarëve që u kërcënohet realisht jeta.”
