Pak ditë më parë, vonesa prej 12 orësh e tragetit të linjës Ankona-Durrës, “Adria Ferries”, shkaktoi mjaft panik në radhët e pasagjerëve, por edhe shqetësim tek familjarët e tyre, që çdo vonesë të tij ngrinte aludime për fatin e tyre. Kompania në fjalë, vonesën e justifikoi si një defekt në motor, prej të cilit u detyrua të lundronte në det ngadalë, e duke u ankoruar në portin e Durrësit me 12 orë vonesë.
Burime konfidenciale për gazetën Tellalli.al, bëjnë me dije se trageti i linjës “Adria Ferries”, nuk pësoj defekt kur lundronte në ujërat e shtetit fqinj, por se mjeti lundrues është nisur me defekt nga porti, pasi ai ka pasur anomali në motor prej të dielës së shkuar. Ky është një skandal i vërtetë, pasi një traget në kushtet e një defekti të tillë, në det të trazuar mund të shkaktoi një tragjedi të vërtetë, deri tek humbja e jetëve të të gjithë pasagjerëve që mban në bord. Por për kompaninë në fjalë, një defekt i tillë nuk ka mjaftuar të “ndalojë” tragetin të rrezikojë jetën e 850 pasagjerëve të tij.
Për tu ndalur tek pasagjerët, mësohet se trageti ka kapacitet 550 pasagjerë + stafin, por në bordin e saj kanë udhëtuar rreth 850 pasagjerë, që është një tjetër shkelje e rëndë dhe thyen rregullat e lundrimit në det. Sipas të njëjtit burim, mësohet se Autoriteti Portual, ka qenë në dijeni të të gjithë problematikave, por nuk ka marrë asnjë masë për ta ndaluar këtë udhëtim që rrezikoi jetën e pasagjerëve, madje ka heshtur në mënyrë të turpshme mbi këtë fakt.
Mësohet se kompania në fjalë, u bënë presion firmave që kryejnë transportin me këtë traget të heshtin, Autoritetit Portual t’ia “mbyllin gojën”… dhe shpesh herë denoncimi i këtij skandali, ka sjellë pezullime nga puna të shoferëve të kamionit, që kanë ngritur zërin për rastet në fjalë.
Nga prononcimi i njërit prej pasagjerëve në traget, ai e cilësoi udhëtimin më të tmerrshëm në jetën e tij: “Unë udhëtoj me traget shpesh, por kjo ishte çmenduri. Kur kam udhëtuar nga Ancona për në Igumenitsa, më është dashur 15 orë udhëtim, që është dyfishi i rrugës, kurse me këto tragete udhëtimi zgjat minimalisht 21 orë, flas kur nuk ka probleme. Mirë që na dhanë ujë për të pirë të paktën, se ushqimet ishin të gjitha me produkte të ndenjura apo të skaduara!”
Nga të tjera burime konfidenciale, mësohet se pjesa më e madhe e trageteve që lundrojnë në brigjet tona, asnjëri prej tyre nuk e “kalon klasën”, por të gjithë heshtin kundrejt “plaçkës”… deri sa të ndodh një tragjedi e vërtetë dhe rasti të bëhet kronik e një ngjarje të paralajmëruar. Pse hesht Autoriteti Portual Durrës, pse hesht Ministria e Transporteve me në krye z. Sokol Dervishaj, mos vallë mendojnë se jeta e tyre është më e rëndësishme se ajo e 850 pasagjerëve që ndodheshin në atë traget?!
