LSI nuk i ka ndalur sulmet ndaj PS-së edhe këtë të shtunë, por edhe në krahun tjetër përgjigjja ka qenë “flakë për flakë”. Vetëm se pas përplasjes së burrave të fortë Luan Rama dhe Saimir Tahiri debati u përhap edhe te gratë e dy partive të majta që qeverisnin vendin. Ishte fillimisht është Monika Kryemadhi, bashkëshortja e Ilir Metës që sulmoi qeverinë sa i përket ligjit të arsimit të lartë dhe maturës shtetërore.
“LSI ka bere kompromise per hir te koalicionit, votuam ligje si ai i matures shteterore, kompromiset qe kemi bere cenuan maturantet. Ligji i arsimit te larte, mesim per te ardhmen”. Unë uroj që matura shtetërore e këtij viti të jetë ajo çka ne presim të jetë sepse po cenove ëndrrat edhe shpresat e një maturanti, të një të riu, për të ardhmen, ke cenuar shpresat dhe të ardhmet e një vendi” – tha Kryemadhi.
Kësaj deklarate iu përgjigj Ministrja e Arsimit, Lindita Nikolla. Në një postim në “Facebook”, Nikolla i shkruan drejtpërdrejt Kryemadhit, ku i kujton se reformën në Arsim e bënë së bashku dhe madje, e ndihmën e bashkëshortit të saj, Ilir Meta.
“E dashur Monika, dëgjova me habi prononcimin tënd kundër praktikës së re të Maturës Shtetërore! E mirëkuptoj klimën e vigjiljes së fushatës, ashtu siç mirëkuptoj çdo kritikë, edhe nga ti vetë, pavarësisht se jemi shpjeguar jo një herë sy më sy për Maturën Shtetërore. Praktika e re e Maturës Shtetërore që krijoi kushte krejt të reja konkurrueshmërie dhe transparence, është fryt i një pune të madhe e të përbashkët. Siç ti e di fare mirë ka qenë një proces gjithëpërfshirës, ku janë dëgjuar me shumë respekt edhe vërejtjet e grupeve parlamentare, përfshirë dhe LSI-në. Jo vetëm kaq, po vetë Kryetari i Kuvendit ka ndihmuar personalisht për zhvillimin e një debati të brendshëm shumë konstruktiv mes përfaqësuesve politikë dhe ekspertëve të partive të koalicionit” – shkruan Nikolla.
Mbi këto replika ka ardhur edhe një reagim i deputetes së Partisë Socialiste Blerina Gjylameti. Në një intervistë për Report Tv, Gjylameti ironizoi LSI-në, duke thënë se PS është lokomotiva në zgjedhje ndërsa partitë e tjera janë vagonët.
“Kur diskutojmë koalicion me koalicion, shikojmë qasje të ndryshme, por dhe brenda koalicionit jemi konkurrentë me njëritjetrin. Sa më shumë të punohet, aq më e fortë është partia që kryeson. Ne jemi një pari lokomotivë, të tjerët kanë të bëjnë me vagonët që i bashkëngjiten”, – tha Blerina Gjylameti./lapsi.al/
