Data 27 shkurt ishte afati i fundit në të cilin Bashkia e Tiranës priti ofertat e konsulencës për ndërtimin e një parkingu nëntokësor në Rrugën e Elbasanit.
Në vijim të rikualifikimit urban në kryeqytet, Bashkia e Tiranës ka njoftuar projektin e “Studim projektimi, Rikonceptim i parkut të lojërave të fëmijëve dhe parkim publik 2 kate nëntokë në Rrugën e Elbasanit. Sipas shpalljes në Agjencinë e Prokurimit Publik, konsulenca për këtë projekt do të kushtojë 7 milionë lekë.
Shërbimet nëntokësore të parkingut janë duke u bërë një trend për Bashkinë e Tiranës. Aktualisht dy parkingje të tilla po ndërtohen, njëri poshtë sheshit ‘Skënderbej’ në qendër të Tiranës dhe tjetri në fillim të Bulevardit të Ri, në vendin e quajtur ish-Stacioni i Trenit.
Por ambientalistët i kanë kritikuar këto lloj investimesh, për shkak të ndikimit negativ që kanë në mjedis. Më herët në lidhje me parkingjet nëntokësore, kryetari i Bashkisë së Tiranës është shprehur se vetëm në qendrën e Tiranës, me dy parkingjet publike nëntokësore të bashkisë dhe 4-5 të hoteleve të reja, qendrave tregtare dhe xhamisë së re, kjo zonë do të ketë 2000-2500 vende parkimi.
Një projekt i mëparshëm për të ndërtuar një parking nëntokësor në Parkun Rina është kthyer mbrapsht. Gjithashtu, bashkia më e madhe në vend ka hequr dorë nga dhënia me koncesion e këtij shërbimi.
Krijimi i hapësirave nëntokësore dhe mbitokësore për parkingje kundrejt pagesave 100 lekë për një orë i ka siguruar të ardhura të konsiderueshme Bashkisë së Tiranës. Ndonëse ende nuk ka të dhëna për ecurinë me zëra të të ardhurave buxhetore bashkiake, Veliaj ka pohuar se të ardhurat nga parkingjet janë bërë shkak për realizimin e një sërë investimesh në kryeqytet.
