Top Chanel ka “zbuluar” një sulm që sipas këtij televizioni gazeta Rilindja Demokratike i bën Majlinda Bregut. Për këdo kishte bërë përshtypje shfaqja në protestë e ish ministres së Integrimit të veshur me nje pallto të shtrenjtë dhe me një shall Hermes, por Top Channel ka parë më larg se kaq. Televizioni ka zbërthyer se mesazhi i kriptuar i RD drejtohej kundër Majlindës.
Organi zyrtar i demokratëve shkruante sot për “ndonjë që po zvarritet me mundim dhe imponim tek sheshi i protestës, duke vënë kushte dhe ultimatume, se e mbështesin protestën “vetëm nëse nuk afrohet dikushi”” Këta individë,- shkruan “Rilindja Demokratike” – vijnë aty si korrierë të pushtetit për të bërë diversion me kalkulimet politike që bën Rama. Mos i shikoni si opozitarë. Janë zvarranikë të paguar me honorare të majme nga pushteti”, thuhet në RD.
Ata, vazhdon më tej “Rilindja Demokratike”, që vijnë në atë shesh të rezistencës të porositur dhe bëjnë deklarata për parcelizim të protestës, duhet të kuptohet se nuk janë të lirë.
Por sipas Top Channel, “megjithëse nuk përmendet në asnjë rresht të editorialit, qartazi “Rilindja Demokratike” i referohet qëndrimit të mbajtur nga deputetja Majlinda Bregu, e cila shkoi në protestën që po mbahet para Kryeministrisë dhe shprehu mendimin e saj kundër bojkotimit të zgjedhjeve”.
A është e sigurtë se RD ka sulmuar Bregun? Top Channel nuk jep asnjë info më shumë për këtë. /Lapsi.al
