Punimet për ndërtimin e “Velierës”, një projekt i diskutueshëm pasi prek edhe zonën arkeologjike të qytetit të Durrësit, u pezulluan dje me një vendim të gjykatës administrative të qytetit bregdetar.
Ky vendim ama vlen vetëm për punimet që kryhen në këtë zonë, pra në Zonën A. E në fakt në Zonën A është vetëm gjysma e projektit. Gjysma tjetër është nën rrugën që ndan portin me Torren Veneciane. Pra, sipas vendimit të Gjykatës Administrative, në pjesën poshtë rrrugës mund të punohet.
Dhe sot në të vërtetë punimet vazhdojnë. Vijimi i punimeve e bën krejt të pakuptimtë vendimin e Gjykatës Administrative.
Për ç’arsye hidhet beton në pjesën e poshtme kur, sipas vendimit të Gjykatës, projekti në tërësi rrezikon zonën arkeologjike?
Vlen të sqarohet se dy këmbët mbi të cilën do të mbahet Vela gjigande prej betoni janë poshtë rrugës, ndërsa dy të tjerat në zonën aerkeologjike, ku dolën në dritë rrënoja të tjera antike, gjatë punimeve.
Atëherë, Veliera do të qëndrojë vetëm me dy këmbë?
Kjo situatë e krijuar ngre disa pikëpyetje të tjera. Mos vallë vendimi i Gjykatës Administrative të Durrësit është marrë vetëm për të shfryrë disi revoltën e publikut që u ngrit në protesta dhe projekti do të vazhdojë drejt qëllimit final për ta përfunduar atë ashtu siç ishte parashikuar?
Cila është arsyeja që po punohet në pjesën e poshtme të rrugës kur projekti duket i rrezikuar pasi gjykata mund t’i ndërpresë përfundimisht punimet?
Përse po vazhdojnë të harxhohen paratë e taksapaguesve me projektin 6 milionë dollarësh kur nuk është e qartë nëse do të lejohet apo jo ky projekt?
Veliera ka ngjallur debate të shumta jo vetëm për faktin se po prek zonën arkeologjike. Kundërshtarët e saj e konsiderojnë një shpenzim të pakuptimtë në një qytet që ka për të zgjidhur probleme disa herë më të mëdha.
Presioni i shoqërisë civile e detyroi kryetarin e Bashkisë, Vangjush Dako, të premtojë se do ta ndryshonte projektin, nëse arkeologët do të vendosnin për të mos i konsvervuar zbulimet e reja arkeologjike.
Por deri tani nuk është parë ndonjë projekt alternativ. Përkundër shqetësimeve dhe vendimit të Gjykatës Administrative, te Veliera vazhdon të punohet pa ndërprerje me projektin e vjetër, raporton “Lapsi.al”.
Vendimi i ndryshuar i Gjykates Administrative te Durresit
