Ka zgjatur 2 orë takimi “kokë më kokë” ndërmjet kryetarit të Kuvendit Ilir Meta dhe ambasadorit të SHBA, Donald Lu. Takimi u mbajt sot në Kryesinë e Kuvendit.
Takimi Meta-Lu vjen vetëm disa ditë pasi Meta foli pa dorashka ndaj ambasadorit Lu në emisionin “Top Story”.
JA DEKLARATA E METES NE EMISION:
“Ambasadori i Shteteve të Bashkuara të Amerikës në tërësi dhe natyrisht edhe ambasadori Lu në veçanti në rastin konkret, kanë një vend të veçantë, sepse Amerika ka një vend të veçantë në raportet tona dhe ne e kemi pranuar këtë gjë. Të jeni të sigurt se po të ishte ambasadori i një vendi tjetër, kam përshtypjen që shumë prej veprimeve dhe sjelljeve do të ishin pak si të papranueshme nga…
…Ne pa dyshim që pranojmë edhe kritika, edhe publike, sepse pa dyshim që kemi nevojë edhe të përmirësohemi më tej, por absolutisht asnjë ambasador nuk mund të zëvendësojë institucionet në Shqipëri, sepse nuk e ndihmon Shqipërinë të ecë përpara dhe të ndërtojë institucione të qëndrueshme. Asnjë ambasadë nuk mund ta bëjë këtë gjë, madje do të thosha asnjë shtet nuk mund ta bëjë këtë gjë dhe as nuk e ka vullnetin dhe as nuk ka politikën për ta bërë këtë gjë.
Në këtë drejtim kontributi më i madh që mund të jepet është gjithmonë në partneritet, duke mbështetur, duke ndihmuar, duke i konsoliduar institucionet shqiptare, sepse mandati i ambasadorëve është një mandat i përkohshëm 3 deri në 4 vjet, ndërsa reforma që ne duam të bëjmë, praktikisht e drejtësisë, është një reformë që do të ketë impakt për 20-30 vjetët e ardhshëm të Shqipërisë dhe të raportit të partneritetit tonë me Shtetet e Bashkuara apo me Bashkimin Europian. Kështu që reagimet e tij janë gjithmonë të mirëpritura, absolutisht, por është e rëndësishme që të jenë gjithmonë edhe të mirargumentuara.
Qëllimi ynë është të zgjidhim problemet, nuk është të krijojmë ndonjëherë edhe probleme të paqena dhe kjo kërkon një bashkëpunim më të ngushtë institucional.”