4 ditë pas grabitjes në aksin Tiranë – Rinas, policia ka hapur një hetim të gjerë mbi autorët e dyshuar. Mësohet se dhjetëra persona janë shoqëruar për tu pyetur ose që mund të kenë dijeni për ngjarjen. Të njëjtat burime thanë se mes të shoqëruarve janë edhe dy persona nga Lushnja. Ata kanë qenë në zonën ku ndodhi ngjarja rreth orës 13:00 të datës 9 shkurt. Lëvizjet e tyre në zonë janë identifikuar nga qelizat telefonike. Pas pyetjes për rrethanat policia ka liruar njërin prej tyre, ndërsa tjetri vazhdon të mbahet në Policinë e Tiranës.
Ndërsa “News24” raporton se të shoqëruarit nuk i është komunikuar ende asnjë akuzë. Ai vazhdon të mbahet në polici pasi nuk ka dhënë një arsye konkrete mbi motivin se pse kishte qenë në atë zonë ditën e ngjarjes. Të njëjtat burime thanë se pista kryesore e hetimit, e cila po ndiqet nga policia është se autorët e kësaj ngjarje janë shtetas kosovarë.
Edhe hetimet për ngjarjen e 3 dhjetor 2015 e çuan policinë drejt kësaj piste. Modifikimi i njëjtë i makinës me të cilën goditet blindin, mekanizmi i njëjtë, si edhe djegia e makinave ka çuar policinë në dyshimin që kemi të bëjmë me të njëjtin grup kriminal.
