Këto ishin disa nga kërkesat e përfaqësuesve të Shoqërisë Civile sot në Komisionin Parlamentar të Medias, e cila ka ngritur shqetësimin mbi gërmimet që po bën Bashkia e Durrësit për ndërtimin e sheshit “Veliera”, të cilat kanë nxjerrë në sipërfaqe objekte të çmuara të periudhës Mesjetare të Durrësit.
“Bashkia duhet të gërmonte 200 m larg Torrës Veneciane. Projekti Veliera po nderohet 5 m larg. Një projekt që kushton 6 milionë euro”, thanë ata.
Ambientalisti Sazan Guri tha se Bashkia e Durrësit nuk ka leje mjedisore për kryerjen e këtyre punimeve. “Nuk posedon një leje mjedisore dhe për këtë dhe është gjobitur Vangjush Dako, por pak rëndësi ka gjoba në lekë se nuk ishte e madhe, 10 milionë lekë të vjetra krahasuar me dëmin që po bën”.
Madje sipas tij historia e Durrësit fshihet që nën 10 cm e para të tokës.
“Nën 10 cm tokë gjenden 500 vjet histori, në 100 m 5 mijë vjet histori”.
Sipas Gurit, një krim tjetër mjedisor nuk janë vetëm gërmimet në zonën arkeologjike në Durrës por edhe inertet nga gërmimet që hidhen në det.
“Inertet nga gërmimet hidhen në mënyrë skandaloze në det. Ky është një tjetër shqetësim që ne kemi ngritur”.
Në komision ishte e pranishme edhe ministrja e Kulturës, Mirela Kumbaro.