Pak ditë para zhvillimit të protestës mbarëqytetare të 18 shkurtit, kreu i opozitës Lulzim Basha ka zhvilluar një takim tjetër, këtë radhë me profesionistët e rinj.
Basha u ka dhënë mikrofonin të rinjve që ta thonë hapur fjalën e tyre publikisht, para medias, duke e vënë theksin tek fakti që Partia Demokratike është e hapur për cilido, është një shtëpi e lirisë.
“Ne jemi për një shoqëri vitale që nuk e duron të keqen, – tha Basha, – e rrëzon dhe ndërton të ardhmen me besim”.
“Ja ku jeni këtu, pa urdhër administrative apo shtetëror, por se këtu jua ndien zemra, të vini këtu në PD, në shtëpinë e lirisë, të ndërtojmë një model vlerash, një model parimesh, që të rrëzojmë këtë infeksion që ka kapur Shqipërinë. Një gjë është e sigurt, konstant: Ndryshimi po vjen!
Protesta e 18 shkurtit është për të gjtiha hallet bashkë. Nuk ka qeveri t’i bëjë ballë presionit të qytetarëve të bashkuar.
18 shkurti do të jetë një protestë madhështore, për këtë ju siguroj. Kudo që kam qenë kam parë një angazhim të madh. Do të jetë një protestë paqesore, një manifestim politik,” theksoi ai.
