35-vjeçarja Elida Zero është shqiptarja e cila i dha fund tragjikisht jetës këtë të djelë, duke u hedhur nga kati i tetë i një apartamenti në Torino.
Gruaja shqiptare, e cila prej kohësh vuante nga një gjendje e rënduar depresive, para këtij akti të rëndë, ka marrë thikën dhe ka qëlluar ndaj djalit të saj 6-vjeçar duke e lënë në gjendje të rëndë.
I vogli është duke u kuruar në spital pas plagëve të marra në bark dhe në duar, çka tregon se ka tentuar të mbrojë veten duke shtyrë me duar nënën.
Një jetë e vështirë, vdekje e rëndë pas një akti të çmendur, – shkruajnë mediat italiane, duke ju referuar historisë tragjike të shqiptares. Elida, e cila për një muaj mbushte 35 vjeç, prej vitesh merrte trajtim nga shërbimet social për depresion të kthyer kronik. Shqiptarja kishte kaluar një jetë të vështirë, që e kishte shturë atë edhe për të jetuar në Francë së bashku me fëmijën, në përpjekje për të kërkuar azil.
Babai i fëmijës së saj është Dante Scrivano, një italian me të cilin Elida ishte ndarë për shkak të akuzave të ndërsjellta për keqtrajtim. Disa javë para tragjedisë, burri i kishte marrë sërish në Torino gruan dhe djalin. Nënë e bir u kthyen në banesën që burri kishte lënë të lirë për to, në rrugën Bologna 267, ku sot në mëngjes, rreth orës 11:30, ndodhi fatkeqësia.
Duke folur për mediat italiane, babai i djalit 6-vjeçar thotë se gruaja ka pasur probleme të mëdha.
“Të enjtën më telefonoi për të më thënë se do të bënte ndonjë marrëzi. Më ka akuzuar prej vitesh se kisha femra të tjera, se e tradhtoja”, shton ai.
Dante Scrivano ndodhej në banesë këtë mëngjes, kur Elida mori një thikë, goditi disa herë fëmijën e saj në gjoks dhe në krah dhe më tej doli në ballkon duke u hedhur nga kati i tetë.
Ndërkohë, edhe fqinjët thonë se e kishin dëgjuar shpesh shqiptaren të thoshte se nuk ja dilte dot, se një ditë do të hidhej. Sigurisht askush nuk priste që shqiptarja të vetëvritej me të vërtetë .