Negociatori në Këshillin e Energjisë në Vjenë, Dirk Bushle fundos ka nxjerrë zbuluar qeverinë shqiptare në çështjen e konfliktit mes DIA -s dhe kompanisë çeke CEZ.
Sipas tij kjo çështje ka qenë dhe “arma” që ka përdorur Rama për të shantazhuar aleatin e tij në qeveri, Ilir Meta.
Kjo e dhënë ka dalë nga marrja në pyetje e dëshmitarëve në Prokurori, në kohën kur zhvillohej hetimi për këtë çështje, pas denoncimit nga ana e KLSH. I mandatuari për negociata Dirk Bushle ka nxjerrë dhe deklaratat kontradiktore të ministrit Gjiknuri dhe Avokates së Shtetit, Alma Hicka.
Në deklarimet e tyre në Prokurori të dy këta persona, njëri ministër i Energjetikës dhe tjetri Avokat i Shtetit, kanë deklaruar se ka qenë presioni i ndërkombëtarëve që kanë detyruar qeverinë shqiptare ta merrte përsipër çështjen e Kastriot Ismailajt.
Por nuk është i këtij mendimi negociatori Bushle, njëkohësisht dhe nëndrejtor i Sekretariatit të Energjisë në Vjenë, i cili mësohet të ketë thënë se, “Përfaqësuesit e qeverisë Shqiptare i ofruan CEZ Shpërndarje (filiali në Shqipëri) të ndërmerrte të gjitha detyrimet potenciale nga çështja e hapur me DIA nëse CEZ a.s ( qendra në Çeki) siguronte përkushtimin e plotë për të mbështetur CEZ shpërndarje sh.a, si një mundësi për Shqipërinë, që të ndërmarrë detyrimet e kësaj çështjeje”.
Me pak fjalë, shteti shqiptar del garant për të marrë përsipër detyrimet që lindin nga një marrëveshje mes dy kompanive private. Shteti shqiptar merr përsipër të ndërhyjë në një çështje e cila ishte detyrim i CEZ ta paguante ndaj kompanisë DIA, ndërkohë që kjo duhet të ishte pjesë e marrëveshjes mes dy firmave private ku tek të dyja rezulton avokat Envi Hicka, bashkëshorti i Avokates së Shtetit Alma Hicka.
Në takimin e katërt të datës 2 prill 2014, është arritur dhe përfundimi i rezolutës së marrëveshjes mes kompanisë dhe qeverisë shqiptare: “Kompensimi për çështjen DIA është jashtë negociatave dhe Shqipëria do të marrë përgjegjësinë e plotë për çështjen dhe të gjitha rezultatet e mundshme të saj. Dispozitat e informacionit të lidhur me çështjen DIA do të reflektohen në një marrëveshje të veçantë jashtë rezolutës ”, thuhet në dëshminë e thënë nga Bushle të dhënë në prokurorinë e Tiranës.
