Si pasojë e një krize të rëndë epileptike, Jessica Sharman, 20-vjeçare nga Britania e Madhe, humbi kujtesën. Ajo nuk arrinte të njihte as të dashurin e saj, Rich.
Por ky i fundit donte me çdo kusht të vazhdonte me të dashurën e vet dhe falë këmbënguljes së tij të madhe, ia doli më së miri ta bëjë Jessica-n të bjerë në dashuri për së dyti me të.
“DailyMail” raporton se si Lucy, protagonistja e filmit “50 takimet e para”, edhe Jessica është katapultuar papritur në një botë krejtësisht të panjohur, për tu zbuluar ditë pas dite edhe pse ka jetuar tashmë 20 vite. Për ti fituar sërish zemrën asaj, nuk ishte e mjaftueshme një buqetë me lule apo një letër dashurie.
“Isha e tmerruar. As që ia kisha idenë kush ishte ky djalë, madje edhe prindërit e mi nuk më kujtoheshin. Nuk dija emrin tim”, thotë vajza.
Ajo kujton se bota për të kishte ndaluar në trenin me të cilin po ikte për në punë, bashkë me të dashurin e saj, marsin e kaluar, kur u godit nga një krizë e fortë epilepsie. Mjekët nuk kanë qenë të sigurt dhe i kishin thënë se memoria mund ti kthehej në 6 muaj, por mund edhe të mos i rikthehej fare.
Nga ana tjetër i dashuri i saj vazhdonte me durim e qëndrueshmëri, misionin e tij, duke e nxjerrë vajzën për shëtitje të gjata në park, për darka në restorante dhe duke e bërë të shijojë të gjitha kënaqësitë e një jete të harruar.
Në fund u shpërblye. Jessica ra sërish në dashuri më të.