Kreu i Kuvendit të Shqipërisë Ilir Meta ka theksuar edhe njëherë se ka qenë gjithmonë mbështetës i reformës në drejtësi dhe miratimit të saj me konsensus.
Ai tha se edhe Shtetet e Bashkuara të Amerikës e kanë ditur që në fillimin qëndrimin e tij për këtë reformë dhe nëse ka pasur ndonjë ‘dyshim’ për të kundërtën, Meta tha se mund të bëhet fjalë për persona që dezinformojnë ambasadorin e SHBA në vendin tonë.
“Nëqoftëse zoti Meta nuk do të kishte qenë i qartë dhe aq këmbëngulës për konsensusin, në Shqipëri sot do të ishte një Shqipëri tjetër, një rekomandim pozitiv nga komisioni Evropian kurrë nuk do të kishte Shqipëria po të mos ishte miratuar me konsensusin e opozitës. Zoti Meta është këtu për të mbrojtur stabilitetin e vendit, reformën në drejtësi. Ngaqë njerëzit e duan shumë ambasadën e dezinformojnë, duhet të kenë shumë kujdes. Unë atë që ta them njëherë të jesh i bindur ta them deri në fund. SHBA e kanë ditur që në fillim qëndrimin tim për reformën në drejtësi. Do të ishte një reformë e zezë nëse do të ishte e njëanshme. Çdo prokuror e gjykatës që rezulton se ka probleme, që është i korruptuar, që nuk justifikon drejtësinë, të hiqen nga sistemi nga i pari tek i fundit, por unë jam kundër asaj që të terrorizohet sistemi në emër të reformës”, – tha Meta në “Top Story”
