Kreu i Kuvendit të Shqipërisë Ilir Meta ka vlerësuar prokuroren Rovena Gashi, të cilët ambasada amerikane në vendin tonë i ka hequr vizën diplomatike.
Sipas Metës, zonja Gashi ka bërë punë që duhet përgëzuar sa i përket strukturës që ajo drejton në Prokurorinë e Përgjithshme, atë të Dekriminalizimit.
Kjo strukturë u ngrit për të parë ‘pastërtinë’ e deputetëve dhe zyrtarëve të larë, ashtu sikundër dhe punonjësve në administratë, dhe është pasuar me disa shkarkime si pasojë e hetimeve nga kjo strukturë.
Meta tha se ka marrë një letër nga prokurorja Gashi e cila i ka shprehur shqetësimin e saj për faktin që i është revokuar viza në mënyrë krejt të papritur. “Jam habitur nga mënyra se si është trajtuar”, – tha Meta.
Pjesë nga intervista në Top Story
Sokol Balla: Masat që po merr ambasada për pezullimin, revokimin apo edhe moslejimin e aplikimit, keni ndonjë koment? Këto po interpretohen si masa ndëshkuese në prag të vettingut. Gashi u anatemua nga SHBA për këtë.
Ilir Meta: Pse është anatemuar zonja Gashi? Ajo duhet të përgëzohet sepse njësia e dekriminalizimit që ajo drejton po jep rezultate shumë të mira.
Sokol Balla: Folët si Adriatik Llalla në letrën që ju ka dërguar ju?
Ilir Meta: Kam marrë një letër nga zonja në fjalë. Jam habitur nga mënyra sesi është trajtuar, por nuk dua të bëj koment për këtë.
Sokol Balla: Jeni habitur, por nuk keni koment?
Ilir Meta: Nuk do të ketë dy procese vettingu. Pra një proces vettignu i konsullatës amerikane, do të ketë vetëm një proces vettingu që do të bëhet sipas institucioneve shqiptare me monitorimin e institucioneve ndërkombëtare të monitorimit.