Kanë kaluar dhjetë muaj nga aksidenti tragjik i helikopterit “EC 145” të Forcave të Armatosura në liqenin e Shkodrës ku humbën jetën dy pilotët.
Prokuroria e Shkodrës ka përfunduar hetimet duke konkluduar se ngjarja ka ardhur si pasojë e gabimit njerëzor të të dy pilotëve.
Paralelisht me këtë konkluzion, Prokuroria e këtij rrethi ka mbyllur hetimet për këtë ngjarje, me argumentimin se personat që kanë konsumuar veprën penale, konkretisht pilotët Donald Hoxha dhe Floran Delia, të shpallur dëshmorë, kanë humbur jetën në aksident.
Gjate 10 muajve të hetimit, organi i akuzës hetoi për dy vepra penale, “lëvizja e trupave pa të drejtë” dhe “shkelje e rregullave të fluturimit ajror”. Sa i takon akuzës së parë janë pyetur mbi 20 ushtarakë, si dhe janë administruar një sërë dokumentesh nga baza ajrore e Farkës, që nga libri i përgatitjes teorike të helikopterit “EC 145” e deri te regjistri i ambulancës për gjendjen shëndetësore të pilotëve.
Në fund të hetimeve rezultoi se, në asnjë rast nuk u konstatuan shkelje nga personeli i bazës ajrore të Farkës mbi rregulloren e fluturimeve ushtarako-ajrore. Ndërsa në hetimet për shkelje të rregullave të fluturimit ajror, Prokuroria, në bazë edhe të pamjeve filmike të kabinës së pilotëve, konkludoi se rrëzimi i helikopterit ka ardhur si pasojë e manovrave të gabuara në kabinën e pilotimit, shkruan TCH.
Dhe duke qenë se nga ky aksident humbën jetën të dy pilotët, organi i akuzës ka mbyllur përfundimisht hetimet për këtë ngjarje.
