Bizneset shqiptare i kanë vënë notën 4 reformës që qeveria e ka shpallur si suksesin e saj më të madh, atë në sektorin e energjisë.
Një sondazh rajonal i Bankës Europiane për Rindërtim dhe Zhvillim, ka gjetur se problemet me energjinë janë pengesa e dytë më e madhe për të bërë biznes në Shqipëri.
Sipas sondazhit, mbi 13.6 për qind e ndërmarrjeve shqiptare cilësojnë aksesin e vështirë, ndërprerjet e energjisë dhe çmimin e saj të lartë si problemin më të madh për të bërë biznes, pas informalitetit, shkruan Syri.net.
Qeveria e ka trumbetuar reformën në sektorin energjetik si suksesin më të madh në mandatin e saj të 4 vjeçar, i cili po shkon drejt fundit. “Transformimi i këtij sektori në një sektor që jo vetëm nuk mbijeton me taksat e qytetarëve, por përkundrazi, ju kthen qytetarëve dhe i kthen vendit, përfitime, është një mrekulli e përbashkët, le ta themi, sepse askush nuk e besonte që kjo mund të ndodhte dhe që mund të ndodhte në një hark kohor kaq të shkurtër,”- deklaroi kryeministri Rama në dhjetor të vitit të kaluar gjatë inaugurimit të disa investimeve në rrjetin e shpërndarjes në kryeqytet. Por ajo që qeveria e quan mrekulli për biznesin është ferr.
Sipas BERZH në asnjë vend tjetër energjia nuk është problem kaq i rëndë për sipërmarrjen se sa në Shqipëri. Në Serbi vetëm 0.2 për qind e bizneseve listojnë energjinë si problemin e tyre kryesor, në Bosnje shifra është 1.5 për qind, ndërsa në Malin e Zi vetëm 1.8 për qind.
Çmimi vetëm rritet Tre vitet e fundit, çmimet e energjisë për biznesin janë rritur me ritme të shpejta duke rënduar kostot e prodhimit dhe duke vënë në vështirësi ndërmarrjet deri në falimentim. Sipas të dhënave zyrtare nga Enti Rregullator i Energjisë, në vitin 2015 u rrit me 20 për qind, nga 11.4 lekë për kilovat që ishte në 13.6 lekë për kilovat.
Veç rritjes së tarifës bazë sipërmarrjet janë përballur edhe me rritjen e tarifave të tjera dytësore si ato të lidhjes në rrjet apo të shërbimeve të tjera. Të dhënat nga Eurostat tregojnë se Shqipëria është aktualisht vendi me çmimin më të lartë të energjisë për biznesin në Ballkan. Por sipas BERZH, edhe pse paguajnë çmimin më të lartë për energjinë, bizneset shqiptare marrin shërbimin më të keq dhe kanë ndërprjet më të shumta të energjisë.
