Futbollisti i Real Madridit, Cristiano Ronaldo mbush sot 32 vjeç.
Ai do të kalojë një fundjavë pa ndeshje, për shkak se është i pezulluar kundër Celta. Andaj portugezi do të ketë kohë për të festuar me familjen e tij, ndërsa ne mund të shohim pas, në 365 ditët e fundit të tij, të mbushura me trofe, suksese dhe buzëqeshje.
“Ishte viti im më i mirë, në nivel kolektiv dhe individual,” – pranon CR7, me dëshirën që të ruajë ekuilibrat e asaj që ka bërë në vitin 2016. Dhe nuk kërkon pak. Botërori për Klubet, Kampionati Europian me Portugalinë, Superkupa e Europës, Liga e Kampioneve, ishin titujt e tij kolektivë.Një nivel i plotë edhe në planin individual: Lojtari më i mirë për UEFA-n dhe FIFA-n (“The Best”), si dhe “Topi i Artë”, duken si një triniteti i shenjtë mes trofeve individual, të cilëve u shtohen edhe tetë çmime të tjera personale. Një vit triumfues, ku përveç shpërblimeve e trofeëve, ai nënshkroi edhe rinovimin e kontratës në “Bernabeu” deri në vitin 2021.
“Kjo është kontrata ime e parafundit,” – tha ai.
Të gjitha gëzimet e sipërcituara, megjithatë, u njollosën paksa nga akuzat për evazion fiskal, si dhe ndrydhja e gjurit në finale e “Euro 2016”. Cristiano Ronaldo mbërriti në Madrid në moshën 24-vjeçare dhe performanca e tij ka qenë e jashtëzakonshme.Me përjashtim të vitit të parë, ai e ka tejkaluar barrierën prej 50 golash.
Këto shifra e kanë bërë atë golashënuesin më të mirë të Real Madridit, me mesatarisht një gol për ndeshje. Ai e ka mbushur “palmaresin” e tij me dhjetë tituj në shtatë sezone, dy Champions, një titull në La Liga, dy Kupa të Mbretit, dy Superkupa Europiane, një Superkupë e Spanjës dhe dy Botërorë për Klube. Tani është 32 vjeç, por ka premtuar se do të luajë futboll deri në moshën 41-vjeçare. Kjo do të thotë se portugezi ka ende shumë për të dhënë, për të fituar dhe pasuruar koleksionin e trofeve individual dhe kolektivë, raporton Telesport.
